Քրեական ենթամշակույթը կրող անձանց կամ այսպես ասած գողականների, օրենքով գողերի մասին աղմկահարույց օրենքի նախագիծն է երկրորդ ընթերցմամբ քննարկվում ԱԺ-ում:
ԲՀԿ պատգամավոր Գեւորգ Պետրոսյանն իր ելույթում հայտարարեց, որ իրենց դիրքորոշումը չի փոխվել. «Մենք միշտ էլ դեմ ենք հանցավոր գործունեությանը եւ դրա արդյունքներին, բայց մի սկզբունք ենք պահում՝ մարդուն պետք է դատել կատարած արարքի համար: Առանց արարք կատարելու մարդուն դատելը չի բխում մարդասիրության սկզբունքներից: Ես դժվարանում եմ էսօր հասկանալ, թե ինչու է կառավարությունը գերակա հռչակել այս պայքարը, որովհետեւ սա ոչ թե հանցավորության դեմ պայքար է, այլ ինչ-որ անորոշ երեւույթների: Գողական աշխարհ….պարոն նախարար էդ ի՞նչ է նշանակում, ով կարա դրա սահմանն ընդգծի: Լավ եք, անում, որ պայքարում եք հանցավորության դեմ, մենակ մի հուշում անեմ ՝ էդ գողական բառի հետ էլի 3 տառով հասկացություն կա, լավ կլիներ նաեւ դրա դեմ պայքարեիք»:
Սա ԱԺ-ում վիճաբանության պատճառ դարձավ:
ԱԺ պատգամավոր Արման Բաբաջանյանը, մոտենալով ամբիոնին՝ ասաց. «Ես հույս ունեմ, որ ԲՀԿ-ի անունից ինչ-որ մեկն էստեղ պիտի ներողություն խնդրի իրենց գործընկերոջ էս խայտառակ պահվածքի համար եւ ԱԺ նախագահին կոչ եմ անում, որ անպայման արձագանքի այս անթույլատրելի պահվածքին»: Բաբաջանյանի կոչին իմքայլականները արձագանքեցին ծափերով:
Կարդացեք նաև
Պետրոսյանը տեղից ինչ-որ բան ասաց, Արման Բաբաջանյանը բղավեց. «Լռե՛ք, եթե ես խոսում եմ»: Արարատ Միրզոյանը փորձեց հանդարտեցնել:
Ըստ Արման Բաբաջանյանի, երկչոտ ու վախվորած ոստիկանությունով մենք չենք կարող պայքարել քրեական աշխարհի եւ հանցավորության դեմ: Մենք նախ պիտի կարողանանք վերազինել եւ անհրաժեշտ գործիքները տալ իրավապահ համակարգին, որպեսզի կարողանանք արմատախիլ անել այսպիսի կեցվածքն ու անպատասխանատու դիրքորոշումը մեզանում: Ամեն ինչ պիտի անենք, որպեսզի վեթինգը, որը այդպես էլ կարծես տեղ չի հասնում դատական համակարգ, արագորեն տեղի ունենա, որպեսզի քրեական դատարանի նախագահը, որը հանցագործների հետ ժամանակ է անցկացնում, չունենանք: Այդպիսի դատական համակարգով չենք կարող պայքարել հանցավորության դեմ, հասկանում ենք, չէ՞: Սա համալիր հարց է ու չենք կարող միայն այս օրենքի ընդունմամբ հարցը լուծել:
Երբ Արման Բաբաջանյանը ելույթից հետո փորձեց զբաղեցնել իր տեղը, ԲՀԿ-ականները, պատրաստ վեճի, ոտքի կանգնեցին ու ուզում էին մոտենալ նրան, բանը կհասներ ձեռնամարտի, եթե չմիջամտեին Իմ քայլի, ԼՀԿ-ի պատգամավորները: Արմեն Խաչատրյանը փորձեց պահել ԲՀԿ-ականներին ու թույլ չտալ, որ մոտենան Բաբաջանյանին, խառնվեցին Սիփան Փաշինյանը, Նաիրա Զոհրաբյանը, Արման Աբովյանը, փորձեցին կրքերը հանդարտեցնել: ԲՀԿ-ականները Բաբաջանյանի վրա բղավում էին. «Չափդ ճանաչի, արա՛»: Թեժ վեճ ու աղմուկ էր նիստերի դահլիճում: Արարատ Միրզոյանը հայտարարեց, որ պատգամավորները չեն կարող հետապնդվել իրենց ելույթների համար, մի ձեւով կարող են դրսեւորվել ԱԺ-ում՝ հերթագրվել ու ամբիոնի մոտ ելույթ ունենալ. «Ով էս նորմերը չի գիտակցում, թող հրաժարվի իր պատգամավորական մանդատից ու գնա հայաթում, բիսեդկեն լռվի»:
Հռիփսիմե ՋԵԲԵՋՅԱՆ
