Քիչ առաջ ավարտվեց «5-րդ ալիք» հեռուստաընկերության սեփականատեր Արմեն Թավադյանի գործով դատական դռնփակ նիստը: Նշենք, որ Արմեն Թավադյանի պաշտպանական կողմը միջնորդություն էր ներկայացրել նրա կալանքը գրավով փոխարինելու վերաբերյալ:
Նիստի ավարտից հետո Արմեն Թավադյանի պաշտպան Հովհաննես Խուդոյանը տեղեկացրեց, որ դռնփակ նիստին մասնակցել է նաև Արմեն Թավադյանը: Պաշտպանը նշեց, որ արտասովոր ոչինչ չի եղել նիստի ընթացքում:
Նա նշեց, որ դատական ակտը կհրապարակվի վաղը՝ հունվարի 21-ին, ժամը 16.00-ին:
Հիշեցնենք, Արմեն Թավադյանը մեղադրվում է մարտի 1-ի դեպքերից տուժած անձանց կաշառելու փորձի համար: Ըստ ՀՔԾ-ի, Թավադյանը ձերբակալվել էր Ռոբերտ Քոչարյանի ենթադրյալ աջակից Վարուժան Մկրտչյանին առնչվող քրեական գործի շրջանակներում, ՀՀ քրեական օրենսգրքի 340-րդ հոդվածի 4-րդ մասի 1-ին կետով նախատեսված հանցավոր արարք կատարելու կասկածանքով:
Կարդացեք նաև
Այսօր առավոտից Վերաքննիչ դատարանի Շենգավիթի նստավայրի առաջ Արմեն Թավադյանի աջակիցները բողոքի ցույց էին անցկացնում՝ պահանջելով ազատ արձակել նրան:
Հիշեցմանը, որ այս գործով անցնող Վարուժան Մկրտչյանը ազատության մեջ է, Հովհաննես Խուդոյանն ի պատասխան ասաց, որ այսօրվա դատական նիստին իրենց հաջողվել է այս հարցի պատասխանը ստանալ և ներկայացրեց իր ենթադրությունը. «Ստացանք այս հարցի պատասխանը, որ անձին շարունակում են կալանքի տակ պահել ցուցմունք կորզելու համար: Քանի որ հաջողվել է այդ ցուցմունքը ստանալ, այդ անձը հիմա ազատության մեջ է, և պարոն Թավադյանը կալանքի տակ պիտի մնա այնքան ժամանակ, քանի դեռ ինքնախոստովանական ցուցմունք չի տվել: Արմեն Թավադյանը ցուցմունք չի տվել, ընդհանրապես չի ցանկացել ՀՔԾ հետ շփում ունենալ»:
Հարցին՝ Արմեն Թավադյանը շփվե՞լ է այս գործով ներգրավված և ազատության մեջ գտնվող Վարուժան Մկրտչյանի հետ, Հովհաննես Խուդոյանը պատասխանեց, թե նա որոշ ժամանակահատված տարբեր գործընթացների մասնակցել է, շփումն այդքանով է եղել:
Տաթև ՀԱՐՈՒԹՅՈՒՆՅԱՆ
