«Եթե ամեն ինչ լավ լիներ, 3-4 հազարամյա անասնապահության պատմության ընթացքում ոլորտը կզարգանար: Այն չի զարգացել, մարդիկ նույն ձեւով են մսարտադրության գործընթացն արել, ու հիմա պետք է փոփոխություն մտցնենք եւ այն համապատասխանեցնենք միջազգային չափանիշներին»,-ԱԺ ամբիոնից այսօր անդրադառնալով անասնաբույծների եւ մսավաճառների բողոքի գործողություններին, ասաց «Իմ քայլը» խմբակցության պատգամավոր Վիկտոր Ենգիբարյանը:
«Բողոքում են, որ սպանդանոցների քանակը բավարար չէ: Իմ կարծիքով՝ սա շատ լավ նորություն է: Եթե բավարար չէ, ներդրում անելու եւ սեփական սպանդանոցն ունենալու տեղ կա: Սա հոյակապ բիզնես է: Կոչ եմ անում նրանց, ովքեր մտածում են, որ միջնորդությունից գումար են կորցնելու, այլ բիզնեսի մասին մտածեն՝ սպանդանոցներ կառուցեն: Իսկ քաղաքացիներն ունեն իրավունք օգտվելու սերտիֆիկացված մսամթերքից, որը թունավոր չի եւ հիվանդություններ չի առաջացնում»,-համոզմունք հայտնեց Վիկտոր Ենգիբարյանը:
Պատգամավորի խոսքով՝ առաջիկայում էլ կլինեն բարեփոխումներ, որոնք գուցե առաջացնեն քաղաքացիների դժգոհությունը, բայց պետք է հասկանալ, որ բարեփոխումները որեւէ մեկի բիզնես շահի համար չեն, այլ փոխվելու եւ զարգանալու:
Կարդացեք նաև
Հիշեցնենք, որ կառավարության որոշմամբ՝ հունվարի 15-ից թարմ մսի սպանդանոցային ծագման պահանջը պարտադիր է, այսինքն՝ անասունները պարտադիր պետք է մորթվեն սպանդանոցներում:
Լուիզա ՍՈՒՔԻԱՍՅԱՆ
