ԱԺ այսօրվա նիստում քննարկվեց «Քրեական դատավարության օրենսգրքում փոփոխություն կատարելու մասին» «Լուսավոր Հայաստանի» օրինագիծը լիագումար նիստերի օրակարգ ընդգրկելու հարցը: Այս օրինագծով, հիշեցնենք, ԼՀԿ-ն առաջարկում է հակասահմանադրական ճանաչված դրույթներից մեկը փոխարինել սահմանադրական դրույթով: Դեռեւս նախորդ տարի Սահմանադրական դատարանը հակասահմանադրական էր ճանաչել դրույթը, որով գրավը կիրառելի է որպես կալանքին փոխարինող միջոց: Ըստ ՍԴ-ի՝ գրավը պետք է կիրառվի որպես առանձին խափանման միջոց:
ԼՀԿ պատգամավոր, օրինագծի հեղինակ Տարոն Սիմոնյանն այսօր հայտարարեց, որ կառավարությունը չցանկացավ առաջարկներ ներկայացնել իր նախաձեռնության վերաբերյալ, որովհետեւ, ըստ պատգամավորի, գործադիրն ինքն է ուզում օրինագծի հեղինակը լինել:
«Ի վերջո, գործընկերներս սոլիդարություն պահպանեցին կառավարության հետ: Սա ԱԺ-ի իրավասության սահմանափակում է՝ հօգուտ կառավարության»,-համոզմունք հայտնեց Տարոն Սիմոնյանը:
Այս օրինագիծը պետաիրավական հարցերի հանձնաժողովում բացասական եզրակացության էր արժանացել: Հանձնաժողովի անդամ, «Իմ քայլը» խմբակցության պատգամավոր Սուրեն Գրիգորյանը պարզաբանեց. «Չկա օրենսդրական սահմանափակում այն հանգամանքում, որ պատգամավորը կառավարությունից շուտ է ներկայացնում օրինագիծ: Բայց օրենքը եռամսյա ժամկետ է տալիս՝ ՍԴ որոշումների կատարման համար եւ ապահովում ավելորդ շտապողականության չդրսեւորումը: Կառավարության եւ մեր տեսակետն այն է, որ այս օրինագիծը բովանդակային խնդիրներ ունի»:
Կարդացեք նաև
Սուրեն Գրիգորյանը կոչ արեց «դեմ» քվեարկել: «Դեմ» քվեարկեց 71, իսկ «կողմ»՝ 37 պատգամավոր, հետեւաբար՝ ԼՀԿ-ի այս օրինագիծը չի քննարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
