ԱԱԾ նախկին տնօրեն Գեորգի Կուտոյանի հոգեհանգստի արարողությունն է այսօր, որին ներկա են նախկին եւ ներկա մի շարք բարձրաստիճան պաշտոնյաներ:
ՀՀԿ-ականները հոգեհանգստին եկել էին միասնական: ՀՀԿ փոխնախագահ Արմեն Աշոտյանն ասաց. «Ուզում եմ նորից ցավակցություններս հայտնել Գեորգի Կուտոյանի ընկերներին, հարազատներին, ընտանիքի անդամներին, բոլոր նրանց, ովքեր շփվել, ճանաչել են նրան: Ես չեմ կարող ասել, որ մենք շատ մտերիմ, ընկերական հարաբերություն ենք ունեցել, բայց մշտապես շփվել եմ Կուտոյանի հետ՝ որպես շատ բանիմաց, հայրենասեր, երիտասարդ կադրի հետ: Աշխատանքային գործունեության ընթացքում տարբեր առիթներով եղել են աշխատանքային խնդիրներ, կարող եմ ասել՝ բացառիկ ազնվության մարդ էր, որի խոսքը խոսք էր: Հաճախ են լինում իշխանության օղակներում տարբեր տեսակի խարդավանքներ, խոսակցություններ, Գեորգի Կուտոյանը շահեկանորեն տարբերվում էր հատկապես իր վերջին զբաղեցրած պաշտոնում՝ առանց որեւէ հավելյալ շահարկման: Դա ես տեսել եմ եւ համոզվել եմ: Մահը ցնցող էր, շոկային էր:»:
Ըստ Աշոտյանի, հատկապես իշխանական քարոզչական դաշտում Կուտոյանի մահը շահարկում են. «Այս մահը դարձել է վհուկների հերթական խրախճանքի առիթ: Մարդիկ, դիակը չսառած, հողին չհանձնված, հոգին չլուսավորված, փրկություն չստացած՝ արդեն սկսել են քաղաքական բնույթի կեղտոտ խաղերը, որոնք պատիվ չեն բերում իրենց՝ որպես մարդկային էակների: Խիստ հիասթափված եմ նաեւ վարչապետի պահվածքից, որովհետեւ կարծում եմ, որ նման տխուր, ողբերգական առիթները նաեւ հասարակությունը միավորելու առիթներ են եւ Կուտոյանի մահը կարող էր դառնալ միավորման, պետական ինստիտուտների գնահատման առիթ: Այն, ինչ մենք տեսանք, ցավոք, տմարդի վերաբերմունք է: Անձնական ցավակցության բացակայությունը դրա երեւի ամենաաղաղակող վկայությունն է»:
Դիտարկմանը, որ կառավարության կողմից ցավակցություն եղել է, Աշոտյանն արձագանքեց, որ այսօր օրը չի դրա մասին խոսելու, բայց «ես շատ մեծ նստվածք ունեմ՝ որպես ՀՀ քաղաքացի: Այս վերաբերմունքը տմարդի է իրականում, բացարձակ չի տեղավորվում քաղաքական լոգիկայի մեջ»:
Կարդացեք նաև
Ըստ Աշոտյանի, սա բարոյականության ճգնաժամի, ատելության մթնոլորտի ահազանգ է, հասարակությունն այսպես բզիկ-բզիկ անել, լարել տարբեր ճամբարներն իրար դեմ ու չօգտագործել առիթը միավորվելու՝ անընդունելի է:
Այնուամենայնիվ, Աշոտյանն ընդգծեց՝ «Կուտոյանն այն մարդը չէ, որի արյունը պետք է շաղախվի քաղաքական խաղերի մեջ»: Նա հորդորեց հետեւել իրավապահ մարմինների աշխատանքին:
Աշոտյանը հաստատեց մամուլի այն տեղեկությունները, որ Կուտոյանը ցանկություն է հայտնել վերադառնալ Հայաստան ու վերադառնալ Սերժ Սարգսյնաի պաշտպանական թիմին. «Այդպիսի խոսակցություն եղել է, որին ի պատասխան հնչել է՝ ավարտիր ուսումդ, կգաս՝ կտեսնենք»:
Հռիփսիմե ՋԵԲԵՋՅԱՆ
