Պետական գույքի կառավարման կոմիտեի նախագահ Նարեկ Բաբայանը Մամուլի շենք եկավ, երբ հրդեհաշիջման աշխատանքներն ավարտվել էին: Aravot.am-ը «Միր» հեռուստաընկերության հարկում զրուցեց նրա հետ:
-Շրջեցիք հարկերում, ձեր աչքով տեսաք ամեն բան: Ի՞նչ կասեք:
-Մեկնաբանելու բան առանձնապես չեմ տեսնում: Կարճ միացում է տեղի ունեցել այն հատվածում, որտեղից բոլոր հարկերի եւ բոլոր բաժանորդների էլեկտրական սնուցումն է կատարվում: Հրդեհ է բռնկվել եւ շախտայով տարածվել է վերեւ: Հրշեջները հասնելուն պես չեն կարողացել անմիջապես անցնել իրենց գործողություններին, որովհետեւ կարիք է եղել նախ շենքը հոսանքազրկելու, ինչը երկար ժամանակ չի հաջողվել: Միայն հոսանքազերծումից հետո արդեն անցել են կրակը մարելուն, 6-րդ հարկում կոտրել են նաեւ շախտայի պատը եւ այնտեղից ջուր թողել, որպեսզի կրակը առաջին հարկից վերեւ չտարածվի: Հրշեջ փրկարարները նաեւ հաստ մալուխներն են կտրել 5-րդ հարկում:
Կարդացեք նաև
-Քանի որ առիթն ընձեռնվել է, ասեմ, որ այս շենքի հետ վարձակալները բազմաթիվ խնդիրներ են ունենում: Ձեր տեղակալն ասաց, որ կոմիտեում դրանց տեղյակ են: Դրանք լուծելու քայլեր նախատեսվո՞ւմ են: Կոնկրետ՝ վերալակների խնդիրը, որոնք շաբաթվա մեջ մի քանի անգամ հերթով խափանվում են:
-Մենք վերելակների հարցը դրել ենք, որպեսզի այս տարի կարողանանք մեկը փոխել: Դա մեր օրակարգում է: Մյուս ընթացիկ խնդիրները, որոնք կան, դա լինի ջրամատակարարման հետ կապված, կամ սանհանգույցների նորոգման, բարեկարգման մեր առաջնային նպատակներից են:
-Վարձակալների՞ հաշվին:
-Վարձակալների հաշվին չի լինի, որովհետեւ եթե կա պայմանագիր եւ նրանք վարձ են մուծում, ոչ ոք լրացուցիչ վճարում կատարելու պարտականություն չունի: Իսկ թե ո՞ւմ հաշվին կլինի, մենք կառավարությունից ենք որոշակի գումար խնդրել, սակայն դա դեռ հաստատված չէ:
-Իսկ ի՞նչ եք կարծում՝ կառավարությունը կհաստատի՞ ձեր առաջարկածը:
-Կարծում եմ՝ այո: Բայց հիմա այստեղ նաեւ վերականգնման ու փոխհատուցման հարց է առաջանում: Պետք է հաշվարկվի, հասկացվի:
-Նկատի ունեք փոխհատուցում վարձակալների՞ն:
-Եթե վարձակալները տուժել են, կարծում եմ՝ այո՛, նաեւ նրանց փոխհատուցում:
-Այսինքն, շենքը ներսից հիմնանորոգելու անհրաժեշտությո՞ւն եք տեսնում:
-Հիմնանորոգում չէի ասի, բայց խնդիր, իհարկե, կա:
-Վերջերս մամուլի շենքի հետ կապված ինչ-որ մրցույթ էր հայտարարվել:
-Դա վերաբերվում էր շենքի արտաքին տեսքին եւ առայժմ դեռ ցանկությունների մակարդակում է:
-Այսօրվա հրդեհի հետեւանքները վերացնելն ինչքա՞ն կտեւի: Չմոռանանք, որ այս շենքում լրատվամիջոցներ են գործում:
-Դժվարանում եմ ասել: Պետք է հաշվարկ արվի, գնահատվի, թե ինչ կարժենա, ինչ միջոցներ, ռեսուրսներ են հարկավոր լինելու:
Աշոտ ՀԱԿՈԲՅԱՆ
