Բաքվի ջարդերի 30-րդ տարելիցին նվիրված՝ Հայաստանի և Արցախի խորհրդարանների միջև համագործակցության միջխորհրդարանական հանձնաժողովի համատեղ հատուկ նիստին ելույթով հանդես է եկել Արցախի Ազգային ժողովի նախագահ Աշոտ Ղուլյանը։
«Մեր ժողովրդի պատմության մեջ որքան նշանակալի են փառահեղ հաղթանակները, նույնչափ կարևոր են հիշատակի և ոգեկոչման արժանի էջերը։ Դրանք մեր պատմության անբաժանելի մասն են, որ գուցե հաճախ հետևանք են եղել մեր անկեղծ դրացիության, հարևանի հանդեպ լիակատար վստահության և մարդասիության»,- հայտարարել է նա՝ ավելացնելով, որ կատարված ոճիրից 30 տարի անց պարզ հարց է առաջանում, թե ինչպես կարող էր նույն ժողովուրդը 3 անգամ ջարդի ենթարկվել մի քաղաքում, որի հիմնաքարերը իր ձեռքով է դրել, պատասխանը մեկն է։
«Ստեղծագործ և արարող հայը չի սպանել իր մեջ մարդասիրությունը, չի լքել իր ժառանգությունը ամեն անգամ հաղթահարելով իրեն հասցված ցավը։ Այն, ինչ տեղի է ունեցել 1990 թ․ հունվարին Բաքվում, հացագործություն է մարդկության դեմ՝ կազմակերպված և իրագործված հարևան պետության իշխանությունների կողմից»,- նշել է Աշոտ Ղուլյանը։
Աշոտ Ղուլյանն ընդգծել է, որ հայատյացությունը շարունակում է մնալ Ադրբեջանի պետական քաղաքականության գերակայությունը, որն արտահայտվում է անգամ կրթության, գիտության, սպորտի և մշակույթի ոլորտներում։
Կարդացեք նաև
Ելույթի ավարտին Աշոտ Ղուլյանն ընդգծել է, որ թեև տեղի ունեցած ոճիրը արձանագրվել և դատապարտվել է միջազգային հանրության կողմից, բայց դրա կազմակերպիչներն ու իրագործողները իրավական պատասխանատվության չեն ենթարկվել։
«Արցախի Հանրապետությունը հետևողական է լինելու Ադրբեջանի տարբեր բնակավայրերում հայության հանդեպ իրագործված ցեղասպանության կազմակերպիչներին և իրականացնողներին պատասխանատվության ենթարկելու հարցում»,- հավելեց նա։
