«Ազգային անվտանգություն» կուսակցության նախագահ Գառնիկ Իսագուլյանը չի շտապում ԱԱԾ նախկին պետ Գեորգի Կուտոյանի մահվան մասին կարծիք կամ գնահատական հայտնել, մինչեւ իրավապահները չավարտեն քննչական գործողությունները, հայտնի չդառնան փորձաքննությունների արդյունքները:
Նա մեզ հետ զրույցում ասաց, որ լավ է ճանաչում Կուտոյանին, նրա հետ աշխատել է նախագահականում, երբ Կուտոյանը նախագահի օգնական էր. «Շատ բարի, լուռ անձնավորություն էր, չէի էլ պատկերացնում, որ երբեւէ կդառնար ԱԱԾ ղեկավար: Այս համակարգը այն համակարգն է, որի ղեկավարը տարբեր կարգի լուրջ տեղեկատվություն է ստանում: Բայց հաշվի առնենք, որ այսօրվա իրականությունն այնպիսին է, որ այսօր շատ տեղեկատվություն նույնիսկ շարքային քաղաքացուն են հասանելի դառնում: Այդ ինչ գաղտնի բաներ կարող էին լինել, որ հանգեցնեին նման հետեւանքների:
Իմ կարծիքով՝ ինքնասպանություն գործելու համար շատ մեծ նշանակություն ունի կոնկրետ անձի հոգեբանական վիճակը, կարող է ոչնչից հանկարծ նման քայլի գնալ: Պատահական չէր, որ նախկինում մինչեւ ԱԱԾ պետ դառնալը, պետք է անցնեիր շատ լուրջ դպրոց, այդ ընթացքում էին դրսեւորվում քո ունակություններն ու հնարավորությունները նման կառույց ղեկավարելու համար: Նա բնավորությամբ շատ մեղմ էր, ներողություն եմ խնդրում, եղել են հարցեր, որոնց առնչվում էինք, թվում էր նույնիսկ, որ ամաչում է »,-ասաց Գառնիկ Իսագուլյանը:
Իսկ վերջին շրջանում նախկին բարձրաստիճան պաշտոնյաների ինքնասպանություն գործելու դեպքերի մասով պարոն Իսագուլյանը կարծում է, որ ինքնասպանություն գործելուն կարող է նպաստել նաեւ երկրում ստեղծված իրավիճակը. «Երկրում տիրող ընդհանուր մթնոլորտը, իրավիճակը, բաժանումը, միմյանց նկատմամբ թշնամանքը ազդեցություն են թողնում նման դեպքերի վրա»:
Կարդացեք նաև
Հիշեցնենք, որ այսօր իր բնակարանում հայտնաբերվել է հրազենային վիրավորում ստացած ԱԱԾ նախկին պետ Գեորգի Կուտոյանի դին: Իրավապահները դեռ պաշտոնական տեղեկատվություն չեն տվել. արդյոք կատարվածը սպանություն, թե ինքնասպանություն է:
Արփինե ՍԻՄՈՆՅԱՆ
