«Եթե Հանրապետության հրապարակում ուզում ենք ունենալ պատմական միջավայրը, որը մտադիր ենք վերաօգտագործել, պետք չէ շտապել: Պետք է հասկանալ՝ Երեւանն այսօր պատրա՞ստ է իր տրանսպորտի վիճակով նվազագույնը երեք տարով հրապարակը փակել բոլոր տրանսպորտային միջոցների համար»,-Aravot.am-ի հետ զրույցում անդրադառնալով Հանրապետության հրապարակի հնագույն շերտի բացմանը՝ ասաց ճարտարապետ, ՀՀ Կադաստրի կոմիտեի նախկին ղեկավար Սարհատ Պետրոսյանը:
Նա նշեց՝ եթե պեղումներից մինչեւ միջազգային մրցույթ ընկած ժամանակահատվածում պահպանվելու են անհրաժեշտ գործընթացները, ցանկացած ծրագիր կարելի է քննարկել:
«Բայց երբ տեսնում եմ, թե մեր քաղաքաշինության գործընթացներն ինչպես են տեղի ունենում, սարսափում եմ, թե ինչ արդյունք կարող ենք ունենալ: Տարբեր հարցերում խնդիրներ ունենք, չեմ ուզում սխալվենք: Պետք է հասկանալ, որ հրապարակը փակելու ենք 3 տարով: Եթե պատրաստ ենք դրան, եկեք սկսենք աշխատանքները: Մնացածն էլ չեմ ասում, թե ինչ արդյունք ենք ունենալու, ինչ է խաթարվելու եւ այլն: Իմ կարծիքով՝ Երեւանի տրանսպորտային խնդիրների պարագայում այսօր խելամիտ չէ դա անել»,-համոզմունք հայտնեց Սարհատ Պետրոսյանը:
Հիշեցնենք՝ հունվարի 9-ին վարչապետ Նիկոլ Փաշինյանը հայտարարեց, որ Հանրապետության հրապարակի տակի պատմական շերտի բացման եւ այն թանգարանային հատվածի վերածելու աշխատանքները սկսված են:
Կարդացեք նաև
Մանրամասն՝ տեսանյութում
Լուիզա ՍՈՒՔԻԱՍՅԱՆ
