Հունվարի 8-ին Իրանի կողմից Իրաքում ամերիկյան ռազմաբազայի վրա հրթիռային հարվածից վիրավորվել է ամերիկացի 11 զինծառայող: Այս մասին գրում է Defense One պարբերականը՝ վկայակոչելով ամերիկյան ռազմական աղբյուրները:
Տուժածների մեծ մասի մոտ արձանագրվել է ուղեղի ցնցում: Զինվորականներին այս շաբաթ տեղափոխել են Քուվեյթի և Գերմանիայի հիվանդանոցներ: Այնտեղ նրանց կհետազոտեն և բուժում կնշանակեն:
Հունվարի 9-ին իրանցի գեներալ Ամիր Ալի Հաջիզադեն բացատրել էր ամերիկյան բազայի վրա հարվածի ժամանակ զոհերի բացակայությունը: Նրա խոսքով՝ Թեհրանը հարվածել էր ոչ թե ամերիկացի զինվորներին սպանելու, այլ Վաշինգտոնի ռազմական մեքենային հարված հասցնելու համար:
Հիշեցնենք, հունվարի 8-ի գիշերը Իրանը հրթիռային հարված էր հասցրել Իրաքում ԱՄՆ ռազմական օբյեկտներին: Դա պատասխանն էր ԱՄՆ-ի կողմից Իրաքում իրանական «Ալ-Ղոդս» էլիտար ստորաբաժանման հրամանատար, գեներալ Ղասեմ Սոլեյմանի սպանությանը: Հաջորդ օրը ԱՄՆ նախագահ Դոնալդ Թրամփը հայտարարել էր, որ ոչ մի ամերիկացի զինվոր չի տուժել:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
