«Բարև ձեզ, Ռազմիկ Աշոտիչ, ինչպե՞ս եք: Մենք ուզում ենք դուք առողջ լինեք այնքան ժամանակ, մինչև կասեք մեր երեխաների տեղը»,-ահա այսպես այսօր Երևանի ընդհանուր իրավասության դատարանում, որտեղ քննվում է առողջապահության փոխնախարար Արսեն Դավթյանի կաշառքի գործը, որով անցնում է «Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի» տնօրեն Ռազմիկ Աբրահամյանը՝ նրան ընդմիջման ժամանակ դիմեց մայրերից մեկը` Հայկուհի Խաչատրյանը, որը պնդում է, որ իր երեխային նույնպես վաճառել են:
Հիշեցնենք, որ Ռազմիկ Աբրահամյանին մեղադրանք է առաջադրվել քրեական օրենսգրքի 167-րդ հոդվածի 2-րդ մասի 2-րդ կետով (ծնողներից երեխային ապօրինի բաժանելը կամ երեխային փոխելը) և 200 -րդ հոդվածի 3-րդ կետով (առևտրային կաշառք)։
Հայկուհի Խաչատրյանի այն դիտարկմանը, որ ուզում ենք առողջ լինեք այնքան ժամանակ, մինչև գտնենք մեր երեխաներին` Աբրահամյանը պատասխանեց, որ որդեգրման հետ ծննդատները ոչ մի կապ չունեն: Հայկուհի Խաչատրյանը հակադարձեց. «Որդեգրման չէ, ինձ ասացիք իբրև թե երեխան մահացել է, բայց իմ երեխան մահացած չի, որտե՞ղ է իմ երեխան, սեպտեմբերի 24-ին դուք եք ծննդաբերության ժամանակ ներկա»: Ռազմիկ Աբրահամյանն ասաց. «Գնացեք, հետազոտեք, գտեք»:
Հետո Ռազմիկ Աբրահամյանը հանեց իր լուսանկարները հիվանդանոցային ու ասաց, որ լրագրողներն իրեն այդ վիճակի են հասցրել:
Հռիփսիմե ՋԵԲԵՋՅԱՆ
