Վիճակագրական կոմիտեի` Հայաստանի Հանրապետության սոցիալական վիճակը տարեկան հրապարակումները ներկայացնում են տարբեր ուսումնական տարիներին հանրակրթական հաստատություններում դասավանդող ուսուցիչների թվաքանակի վերաբերյալ վիճակագրությունը: «Ասպարեզը» ներկայացրել է, որ Վիճակագրական կոմիտեի տվյալների համաձայն` 2018-2019 ուսումնական տարում հանրակրթական դպրոցներում ավելի շատ ռուսաց լեզվի եւ գրականության ուսուցիչ է աշխատել (2784), քան հայոց լեզվի եւ գրականության (2765):
Թեմայի վերաբերյալ Aravot.am-ը փորձեց տարբեր կարծիքներ լսել:
ԵՊՀ Հայոց լեզվի ամբիոնի վարիչ, բանասիրական գիտությունների դոկտոր Յուրի Ավետիսյանն Aravot.am-ի հետ զրույցում նշեց, որ թեմային չի տիրապետում, բայց նաեւ տարօրինակ համարեց այդ թվերը: «Չեմ կարող հստակ ասել, 1000 ու մի պատճառ կարող է լինել, օրինակ՝ այն, որ ռուսերենի ուսուցիչներն ամբողջ ծանրաբեռնվածությամբ չեն աշխատում` ի տարբերություն հայերենի ուսուցիչների»,-ասաց պարոն Ավետիսյանը:
Բանասիրական գիտությունների դոկտոր, ԵՊՀ պրոֆեսոր Ռուբեն Սաքապետոյանն ասաց, որ չի հավատում նշված թվերին, որովհետեւ չի կարող հայոց լեզվի մասնագետների թիվն ավելի փոքր լինել, քան ռուսերենի ուսուցիչներինը: «Դա շատ անհամոզիչ վիճակագրություն է»,-ասաց պրոֆեսորը:
Կարդացեք նաև
ՀՀ ԿԳՄՍՆ Լեզվի կոմիտեի նախագահ Դավիթ Գյուրջինյանը եւս տարակուսանք հայտնեց նշյալ վիճակագրության վերաբերյալ: Նա շեշտեց, որ նախ պետք է ուսումնասիրել թվերը, նոր կարծիք հայտնել: Այնուամենայնիվ նշեց, որ գուցե դա պայմանավորված է հայոց լեզվի ուսուցիչների ամբողջական դրույքով աշխատելով, դասվարների թիվը հաշված չլինելով եւ տարբեր այլ պատճառներով:
ԿԳՄՍ նախարարի մամուլի քարտուղար Անժելա Կժդրյանն էլ Aravot.am-ին հետեւյալը փոխանցեց. «Այդ հաշվարկում մեթոդաբանությունն այնպիսին է, որ հայոց լեզվի ու գրականության ուսուցիչներն ու դասվարներն առանձին տողերով են ներկայացված, մինչդեռ բոլոր դասվարները նաեւ մայրենիի, հայոց լեզվի ու գրականության ուսուցիչներ են: Հետեւաբար, երբ այդ երկու թվերը գումարում ենք, ավելի ճիշտ պատկեր ենք ունենում հայոց լեզվի եւ գրականության մասնագետների»:
Գոհար ՀԱԿՈԲՅԱՆ
