«Ոլորտի խնդիրներն այնքան բազմաշերտ են եւ տարիներով կուտակված: Ճիշտ չէ, երբ օրենքում մեկ կետ է փոխվում, հետո՝ մյուսը: Երբ համալիր փոփոխություններ չեն լինում, մեկ այլ խնդրի ենք բախվում»,- հեռուստատեսության եւ ռադիոյի ոլորտի օրենսդրական բարեփոխումներին նվիրված խորհրդարանական լսումների ժամանակ այսօր հայտարարեց «Երկիր մեդիա» հեռուստաընկերության լրատվական և հասարակական-քաղաքական հաղորդումների տնօրեն Գեղամ Մանուկյանը:
Նրա խոսքով՝ հանրությանը բազմակողմանի ու օբյեկտիվ լրատվություն մատուցելն, իհարկե, կարևոր է, բայց հարցը, երբեմն, մնում է որպես դասագրքային բառակույտ. «Օբյեկտիվ ու սուբյեկտիվ պատճառներ կան: Ամեն խորհրդարանական ու նախագահական ընտրություններից առաջ հեռուստատեսությունները հայտնվում են խայտառակ վիճակում: Մեզ պարտադրվում է հավասար լուսաբանել թեկնածուներին, բայց եկեք պարզ ասենք` երբ քաղաքական գործիչներից մեկը որոշում է որևէ լրատվականում ներկա չլինել, այդ լրատվամիջոցը կարո՞ղ է ապահովել բազմակարծություն»:
Ըստ Գեղամ Մանուկյանի՝ այսօր ամենամեծ ճնշման տակ գործող լրատվամիջոցները հեռուստաընկերություններն են, որոնք օրենքի ճնշումներին են ենթարկվում. «Մենք սահմանափակված ենք տարբեր օրենքներով: Կայքերը, որոնք տեսանյութեր են տալիս, այսինքն՝ հեռուստատեսություն են, նրանց աշխատանքն օրենքով կանոնակարգված չէ: Նրանք չեն ենթարկվում գովազդի կամ բովանդակային սահմանափակման, մինչդեռ հեռուստատեսությունների պես կաբելային տիրույթում են աշխատում»:
Լուիզա ՍՈՒՔԻԱՍՅԱՆ
