«Նոր օրենքով անհրաժեշտություն կա ընդլայնելու կարգավորող մարմնի՝ ՀՀ Հեռուստատեսության եւ ռադիոյի հանձնաժողովի վերահսկողական լիազորությունները՝ ՀՀ Սահմանադրության հնարավորությունների սահմաններում»,-տեսալսողական մեդիածառայությունների ոլորտում օրենսդրական փոփոխությունների թեմայով խորհրդարանական լսումների ժամանակ այսօր անդրադառնալով հեռուստատեսության եւ ռադիոյի ոլորտը կարգավորող նոր օրենքի մշակման առաջիկա աշխատանքներին՝ ասաց «Իմ քայլը» խմբակցության պատգամավոր Վահագն Թեւոսյանը:
Հիշեցնենք, որ «Իմ քայլը» մտադիր է բարեփոխել «Հեռուստատեսության եւ ռադիոյի մասին» ՀՀ օրենքը:
Վահագն Թեւոսյանը շեշտեց. «Սա դեռեւս իմ անձնական կարծիքն է, սակայն արդեն հանրային պահանջարկով պայմանավորված՝ կարիք է նկատվում, որ Հեռուստատեսության եւ ռադիոյի հանձնաժողովի պարտականությունների մեջ մտնի նաեւ հեռուստահաղորդումների տարիքային վարկանիշավորումը, եւ, ըստ այդմ՝ հեռարձակման ժամային գոտիների սահմանումը, ինչպես նաեւ՝ հանձնաժողովին ընձեռնվի արձագանքելու հնարավորություն մի շարք իրավունքների, օրինակ՝ հեղինակային իրավունքի, անձնական կյանքի, խոսքի ազատության կամ սահմանափակ կարողություններով անձանց իրավունքների առնչությամբ հնարավոր խախտումներին, գռեհկությանը, երեխաների եւ կանանց հանդեպ բռնության տեսարաններին, քրեական միջավայրի հերոսացմանը եւ այլն»:
Լուիզա ՍՈՒՔԻԱՍՅԱՆ
