«Ուսումնասիրությունները վկայում են, որ ՀՀ մարզերում հեռուստաընկերությունները կայանալու խնդիր ունեն՝ ինչպես ֆինանսապես, այնպես էլ որակական առումով: Մարզերում բնակչության քանակի անհավասար բաշխվածությունը, շուկայական միջավայրերի երբեմն էական տարբերություններն ամեն մարզի համար չեն ստեղծում հավասար հնարավորություններ՝ ունենալու մեկ, կամ, որ զարմանալի կլիներ որոշ մարզերի դեպքում, մի քանի հեռուստաընկերություններ»,-ԱԺ ամբիոնից այսօր հայտարարեց «Իմ քայլը» խմբակցության պատգամավոր Վահագն Թեւոսյանը:
Հիշեցնենք, որ այսօր տեսալսողական մեդիածառայությունների ոլորտում օրենսդրական փոփոխությունների թեմայով խորհրդարանական լսումներ են, որոնց ընթացքում Թեւոսյանն անդրադարձել է նաեւ մեդիաոլորտի կազմակերպությունների մշակած՝ «Հեռուստատեսության եւ ռադիոյի մասին» օրենքի նախագծին:
Պատգամավորը, դառնալով վերոնշյալին, շարունակեց. «Այս հանգամանքը բարենպաստ տրամադրություն չի ստեղծում մարզային մուլտիպլեքսների (մասնավոր հեռարձակման թվային ցանց.-խմբ.) առաջացմանն ուղղված օրենսդրական փոփոխությունների կատարման համար՝ ամեն մարզում առնվազն մեկ մուլտիպլեքս սկզբունքով: Բացի այդ, առկա է երկու մտավախություն: Նախ, որ նման սփռվածության պարագայում լուրջ բարդություններ կառաջանան կարգավորող մարմնի վերահսկողության իրականացման առումով, եւ երկրորդ՝ փոքր գումարով փոքր մուլտիպլեքս ստեղծելու զուտ քաղաքական գայթակղություն կարող է առաջանալ: Առկա է նաեւ հակառակ պատկերը, երբ մարզում առկա մեկ կամ երկու հեռուստաընկերությունները ստիպված կլինեն փակվել՝ թվային հեռարձակման անցնելու պատճառով, ուստի տվյալ մարզում կա թվային մուլտիպլեքսի անհրաժեշտություն»:
Վահագն Թեւոսյանի խոսքով՝ արդար չէ մի մարզին տալ թվային մուլտիպլեքս ունենալու հնարավորություն, իսկ մյուսին՝ ոչ: «Այս հանգամանքները հաշվի առնելով՝ որպես լուծում առաջարկվում է շեշտը դնել միջմարզային, այսինքն՝ մեկից ավելի կամ կոնկրետ խմբի մարզերում սփռում իրականացնող մուլտիպլեքսների ստեղծման վրա, ինչը նպատակահարմար է մի քանի առումներով՝ հեշտացնում է կարգավորող մարմնի վերահսկողության իրականացումը, ծախսատարության առումով արդյունավետ է, եթե մտադրությունը տնտեսվարումն է, այլ ոչ թե քարոզչությունը: Բացի այդ, ապագայում ստեղծվելիք հեռուստաընկերություններին հնարավորություն է տալիս եթեր ունենալու՝ անկախ դրանց մարզային տեղակայումից»,-հավելեց Վահագն Թեւոսյանը:
Կարդացեք նաև
Լուիզա ՍՈՒՔԻԱՍՅԱՆ
