Անցյալ տարեվերջին ռուսական «Ռեալիստ» լրատվական գործակալության կայքում տեղադրված «Վարսենիկ Ավանյանի երաժշտությունն ավելի է մոտեցնում Սիոնն ու Արարատը» հոդվածից տեղեկանում ենք, որ Մոսկվայում 2019թ. դեկտեմբերին կայացած «Շահար» հրեական շարժման կողմից հրավիրված երեկոն հայ-հրեական մշակութային փոխհարաբերություններում նոր էջ է բացել:
Կայքը գրում է՝ «Երեւանի ազգային օպերային թատրոնի մեներգչուհի, մեցցո սոպրանո Վարսենիկ Ավանյանը հանդես եկավ դասախոսությամբ, խոսեց հրեական եւ հայկական երաժշտության ստեղծագործողների ոգեշնչման աստվածաշնչյան աղբյուրների մասին»: Երգչուհին «Ռեալիստին» տված հարցազրույցում նշել է. «Մենք ճշգրիտ տեղեկություններ չունենք Երուսաղեմի մեղեդիների ազդեցության աստիճանի մասին Հայաստանի հնագույն երաժշտական ավանդույթների վրա, բայց երկու մշակույթների հանդիպման բուն փաստը վաղուց ճանաչվել է ժամանակակից գիտնականների կողմից»:
Երգչուհին՝ Ավիգդոր Էսկինի հետ:
Նաեւ տեղեկանում ենք, որ 2020թ. (օրը նշված չէ) Վարսենիկ Ավանյանն իր արվեստով կնշանավորի հայ-հրեական մշակութային ակտիվ փոխգործակցության սկիզբը: Մոսկովյան «Նիկո» պատկերասրահում մեկնարկելիք երգչուհու մենահամերգը շարունակություն կունենա նաեւ մոսկովյան այլ սրահներում, ապա ՌԴ այլ քաղաքներում: Անկասկած, այն հետաքրքրություն կառաջացնի ոչ միայն հայկական ու հրեական շրջանակներում, այլեւ կներգրավի բարձր արվեստի բոլոր գիտակների ուշադրությունը:
«Առավոտի» հետ զրույցում Վարսենիկ Ավանյանը նշեց, որ անցյալ տարի «Նիկո» պատկերասրահում կայացած երեկոյին՝ նվիրված Կոմիտասի 150 եւ Ավետ Տերտերյանի ծննդյան 90-ամյա հոբելյաններին, իրեն շնորհավորել է հրեա քաղաքագետ, հրապարակախոս Ավիգդոր Էսկինը եւ առաջարկել 2020-ին Մոսկվայում հնչեցնել հայ եւ հրեական վոկալ արվեստի դասական նմուշներ:
Կարդացեք նաև
Վարսենիկ Ավանյանը՝ զեկույցի պահին (Մոսկվա, 2019թ.):
«Ինձ հրապուրեց առաջարկը: Ճիշտ է՝ մեկ-երկու հրեական ստեղծագործություններ կատարել եմ, բայց երբեք չեմ խորացել այդ ժողովրդի երաժշտական գանձարան: Ուսումնասիրելով ընդհանրապես հրեական արվեստը, մասնավորապես՝ երաժշտարվեստը, ինձ համար հայտնաբերեցի, որ այնպիսի կոմպոզիտորներ, ինչպիսիք են Մուսորգսկին, Ռիմսկի-Կորսակովը, Բալակիրեւը, Գնեսինը, Ռավելը, Մենդելսոնը եւ այլ դեմքեր, հենց հրեական ժողովրդական մշակույթի ազդեցության տակ են ստեղծել որոշ վոկալ ստեղծագործություններ…»:
Հետաքրքրությանը, թե Մոսկվայում ե՞րբ կկայանա հայ-հրեական վոկալ երաժշտության երեկոն, մեր զրուցակիցը պատասխանեց. «Մարտի 18-ին «Նիկո» պատկերասրահում կկայանա հայ եւ հրեական վոկալ ստեղծագործությունների «Խորհրդավոր Արեւելք» խորագրով համերգը, կնվագակցի Չայկովսկու անվան պետական կոնսերվատորիայի դասախոս, հրեական արմատներով Կարինա Պողոսբեկովան»:
Երգչուհին հավաստիացրեց, որ մինչ մոսկովյան ելույթը, ծրագիրն ուզում է փետրվարին ներկայացնել նաեւ հայ հանդիսատեսին:
Սամվել ԴԱՆԻԵԼՅԱՆ
«Առավոտ» օրաթերթ
15.01.2020
