Հունվարի սկզբին «Իրազեկ քաղաքացիների միավորում» հ/կ ծրագրերի համակարգող Դանիել Իոաննիսյանն Արցախի անվտանգության խորհրդի քարտուղար Արշավիր Ղարամյանի վերաբերյալ գրառում էր կատարել, որ նրան պատերազմի տարիներին փոխանակել են 3 տասնյակ ադրբեջանցիների հետ: Այնուհետեւ Իոաննիսյանը լրացուցիչ գրառում էր կատարել (մեջբերումը՝ մասնակի). «Արշավիր Ղարամյանի` պատերազմի ժամանակ գերի ընկնելու հանգամանքները և ապա փոխանակմամբ ազատվելու պատմությունն իրարամերժ է: Իմ տեղեկատվությունը (ըստ որի Ղարամյանը գերի է ընկել ավար հավաքելիս և փոխանակվել 32 ադրբեջանցու հետ) գալիս էր Արցախի հերոսի կոչում ունեցող երկու այլ գեներալներից, սակայն այն հակասում է այլ աղբյուրներից եկող տեղեկատվության հետ… Ես հայցում եմ ընթերցողներիս/հետևորդներիս և Ղարամյանի ներողամտությունը՝ չապացուցված տեղեկատվություն տարածելու համար: Իրան-ԱՄՆ առճակատման վերաբերյալ Ղարամյանի հայտարարության մասին իմ քննադատությունը չպիտի համեմվեր այդ անձի մասին չճշտված ինֆոյով: Այո, Ղարամյանի հայտարարությունը հակասում է պաշտոնական Ստեփանակերտի և Երևանի մոտեցմանը ու կարող է խաղաքարտ լինել Վաշինգտոնում ադրբեջանական լոբբիստների ձեռքում»:
Ազատամարտիկ Պավլիկ Մանուկյանի ճեպազրույցի ժամանակ այսօր Aravot.am-ը նրանից հետաքրքրվեց՝ ձեզ ի՞նչ է հայտնի այդ մասին:
Մանուկյան. Ես սա գիտեմ, իհարկե…:
-Կարո՞ղ եք փաստել, որ այդպես է եղել:
Կարդացեք նաև
-Իհարկե, մենք էլ այդ ժամանակ, երբ նա գերության մեջ էր, ուզում էինք գերիներ բռնել, որ հետը փոխանակեինք: Ցանկացած հայի համար էլ պատրաստ էինք ինչ-որ բանով օգնել, սատարել…Նա այդ ժամանակաշրջանում գումարտակի հրամանատար էր: Բնականաբար, պետք է բոլորս էլ այդ ուղղությամբ ինչ-որ մի բան անեինք: Եթե չեմ սխալվում՝ 93թ.-ի ամառն էր:
-Ի՞նչ սկզբունքով էիք փոխանակում:
-Այդ ժամանակ մեկ գերուն էլ էինք 1-ը 10-ի հարաբերությամբ բան անում…Դա ցույց է տալիս, թե ով ինչ արժի, որ ազգն ինչ արժի: Մեր զոհերն էլ միշտ 1/10-ի հարաբերությամբ էին: Գնահատականն ազգային ֆոնի վրա էր:
Հիշեցնենք՝ Արշավիր Ղարամյանը գրել էր, որ Ղասեմ Սոլեյմանիի սպանության համար վրեժ լուծելն արժանապատվության խնդիր է Իրանի համար:
Լուիզա ՍՈՒՔԻԱՍՅԱՆ
