ՀՀ ԳԱԱ Հնագիտության և ազգագրության ինստիտուտի տնօրեն Պավել Ավետիսյանը «Արմենպրեսում» կայացած ասուլիսում նշեց, որ 2019թ-ին Քարի դարին վերաբերող հետաքրքիր արդյունքներ են ստացել նախամարդուն վերաբերող, որը հատկապես կապված է կրակի օգտագործման հետ: Խոսեց նաեւ այն մասին, որ Արտաշատում գտել են հնագույն ջրամատակարարման համակարգի հսկայական հատված, որը վերաբերվում է Հռոմեական շրջանին:
«Մեր լեգենդար մայրաքաղաք Արտաշատը լուրջ արքայանիստ քաղաք է եղել»,-ասաց ինստիտուտի տնօրենը: Ասաց նաեւ, որ Արտաշատի հարեւանությամբ սեփականաշնորհված հողերի մեջ էլ գտել են պալատական շինություններ, որոնց հիմքերը պահպանվել են: Ի թիվս այլնի, գիտնականը խոսեց Լեռնագոգի տարածքում բացահայտված վաղ Նեոլիթյան շրջանի բնակավայրից:
Նա անդրադարձավ Հնագիտության և ազգագրության ինստիտուտի 2020 թվականի ծրագրերին եւ Հանրապետության հրապարակի պատմական շերտի բացմանը:
Պավել Ավետիսյանի խոսքերով, լուրջ խնդիր կա հուշարձանների պահպանության հետ կապված, որոնք առաջանում են քաղաքաշինական մեծ ծրագրեր իրականացնելիս. «Հայաստանի ողջ տարածքը հնագիտական տարածք է, եւ որեւէ գործողություն անելիս պետք է անպայման փորձագիտական եզրակացություն լինի»: Գիտնականի ձեւակերպմամբ, կան հնագույն գերեզմաններ, որոնք ուղղակի հոշոտված են:
Կարդացեք նաև
«Արտաշատից Խոր Վիրապ ճանապարհին մարդիկ հսկայական հատվածներ են ցանկապատել, 100-200քմ վերցրել, դարձրել իրենց ընտանեկան գերեզմանատեղը, մինչդեռ դրանք հուշարձանների վրա են, մի մասն էլ ժամանակին բացված հուշարձանի վրա են կառուցված»,- նշեց ՀՀ ԳԱԱ Հնագիտության և ազգագրության ինստիտուտի տնօրենը:
Հավելեց, որ այժմ աշխատում են պատասխանատուների հետ, որպեսզի համապատասխան փոփոխություն կատարվի Պատմական միջավայրի եւ հուշարձանների պահպանության մասին օրենքում: Նրա խոսքով, օրենքով պետք է հստակեցնել հուշարձաններն ավերելու համար պատժելու չափանիշները եւ խնդիր դնել ՏԻՄ-երի պատասխանատվության:
«Ընկալումը չկա ինչ բան է պատմամշակութային ժառանգություն»,-փաստեց բանախոսը:
Գոհար ՀԱԿՈԲՅԱՆ
