«Սասնա ծռեր» կուսակցության քարտուղարության համակարգող Վարուժան Ավետիսյանը կարծում է, որ Իրան-ԱՄՆ լարված հարաբերությունների ֆոնին ՀՀ-ն սկզբունքորեն առողջ մոտեցում է որդեգրել: «Քանի որ գործ ունենք երկու բարեկամ երկրների հետ, չեզոքություն է պետք պահպանել, բայց նախաձեռնողականության պակաս կա, որովհետեւ տարածաշրջանային լարումների դեպքում նման ձեռնտու դիրք ունեցող երկրները, այդ թվում՝ ՀՀ-ն, կարող են կամրջի-միջնորդի կարգավիճակ ստանձնել: Ցավոք, այդ նախաձեռնողականությունը չկա»,-Aravot-ի հետ զրույցում ասաց Վարուժան Ավետիսյանը:
Նա նշեց. «Նկատի ունեցեք, որ մեծ պատերազմ չի լինելու Իրանի եւ ԱՄՆ-ի միջեւ, թեեւ տարաբնույթ լարումներ կարող են լինել»:
Անդրադառնալով տարածաշրջանային խաղաղությանն ուղղված Փաշինյանի կոչին՝ Վարուժան Ավետիսյանը համոզմունք հայտնեց, որ մոտեցումը ճիշտ է:
Հետաքրքրվեցինք, թե Ավետիսյանն ինչ կարծիք ունի այն փաստի մասին, որ Իրանի իսլամական հեղափոխության պահապանների կորպուսի հատուկ ստորաբաժանման ղեկավար Ղասեմ Սոլեյմանիի սպանության վերաբերյալ դիրքորոշում էր հայտնել Արցախի անվտանգության խորհրդի քարտուղար Արշավիր Ղարամյանը: Վարուժան Ավետիսյանը նշեց. «Ընդհանրապես, Արցախի սուբյեկտացումը դավաճանություն է, իսկ նման ձեւով դրսեւորումները պետք է մերժվեն: Միջոցներ պետք է ձեռնարկվեն, որ Արցախի «դե յուրե» ՀՀ-ին միացման սառեցված գործընթացը շարունակվի եւ ավարտին հասցվի: Այդպիսիք պետք է պատասխան տան՝ քաղաքական, բարոյական, իրավական առումներով, եւ ոչ միայն այդ քայլի, այլեւ իրենց կատարածի համար»:
Կարդացեք նաև
Հարցադրումը կրկնեցինք՝ «Որքանո՞վ եք ճիշտ համարում Արցախի անվտանգության խորհրդի քարտուղար Արշավիր Ղարամյանի կողմից նման հարցում դիրքորոշում հայտնելը»: Վարուժան Ավետիսյանը պատասխանեց. «Ասացի, որ դա դավաճանություն է»:
Հիշեցնենք՝ Արշավիր Ղարամյանը գրել էր, որ Ղասեմ Սոլեյմանիի սպանության համար վրեժ լուծելն արժանապատվության խնդիր է Իրանի համար:
Լուիզա ՍՈՒՔԻԱՍՅԱՆ
