Անցյալ տարի մաքսային ձեւակերպում է ստացել 189 հազար 18 մեքենա, ինչը 2018-ի համեմատությամբ 125 հազարով ավելին է:
2018 թվականին Հայաստան է ներկրվել 64 հազար մեքենա: Այսօր այս մասին հայտնեց Պետական եկամուտների կոմիտեի նախագահ Դավիթ Անանյանը: Ըստ նրա, ներկրման հետ կապված գանձումները կազմել են շուրջ 95 միլիարդ դրամ, այսինքն՝ նախորդ տարվա համեմատությամբ 58 միլիարդ դրամով ավելի:
ՊԵԿ ղեկավարը նաեւ պատասխանեց ընդդիմախոսների այն մտահոգություններին, թե 2020-ի ընթացքում ավտոմեքենաների այսպիսի ներհոսք չի լինելու եւ դժվար է լինելու բյուջեի համար մուտքեր ապահովել:
Դավիթ Անանյանն ի պատասխան ասաց. «Մենք նախկին պարտքերը մարելու ճանապարհով գնալով՝ 170 միլիարդ դրամ վերադարձնելով հարկատուներին, չեզոքացրել ենք ժամանակավոր էֆեկտ ունեցող եկամուտների ազդեցությունը հաջորդ տարիների նկատմամբ»:
ՊԵԿ նախագահը նաեւ ասաց, որ 2019 թ․ պետական բյուջեի հիմքում դրված է եղել 6 տրիլիոն 756 միլիարդ համախառն ներքին արդյունքի ցուցանիշ, որի 20, 75 %-ը ծրագրավորվել է որպես հարկային եկամուտներ:
Կարդացեք նաև
ՊԵԿ-ը 2019 թ․ ԱԱՀ-ի գծով 42,8 միլիարդ դրամ է վերադարձրել հարկ վճարողներին. «Այդ 56,4 մլրդի գծով 2020թ․ հունվարի 1-ի դրությամբ հարկ վճարողների հանդեպ պարտքը կազմում է 11,3 միլիարդ, որից շուրջ 6 միլիարդը ուսումնասիրությունների եւ ստուգումների արդյունքում հաստատվել է որպես ոչ ենթակա վերադարձման եւ նաեւ 2-3 դեպքով հարկ վճարողների նախկին վարքագծին տրվելու է քրեաիրավական գնահատական»:
Դավիթ Անանյանի խոսքով, հարկային եկամուտների փաստացի կատարողականի առումով 2018 թվականը հայտարարել էին հեղափոխական, ինչը արդարացված էր:
Լուսինե ԲՈՒԴԱՂՅԱՆ
