Քաղավիացիայի կոմիտեի ղեկավար Տաթեւիկ Ռեւազյանը զգուշացնում է՝ «լոուքոսթ»՝ բյուջետային ավիաընկերությունների ծառայություններից օգտվելուց առաջ ուշադիր եղեք՝ տոմսի գներից մինչեւ նստատեղի ամրագրում: Այսօր «Արմենպրես» մամուլի ակումբում Ռեւազյանն ասաց՝ «Լոու քոսթ» չի նշանակում ցածր գին, դա նշանակում է, որ ավիաընկերությունը խնայում է իր ծախսերը, եւ սա հնարավորություն է տալիս նվազեցնել ավիատոմսերի գները:
Ռեւազյանը զգուշացնում է՝ 30 եվրոյանոց տոմս գնելիս պետք է հաշվի առնել, որ դա միայն ավիատոմսի գումարն է. օրինակ՝ «Ryanair-ի դեպքում փոքր բեռ կարելի է վերցնել, որը կարող է տեղավորվել օդանավում ձեր նստատեղի տակ. «Այն, ինչ մենք համարում ենք փոքր ճամպրուկ, դրա համար պետք է վճարել։ Եթե ուզում եք 20 կիլոգրամանոց ճամպրուկ տանել, դա ուրիշ գումար է, իսկ եթե ուզում եք օդանավում տեղ ամրագրել, դա էլ լրացուցիչ ծախս է ենթադրում։ Լոուքոսթի մուտքը Եվրոպայում մարդկանց սովորեցրել է, որ կարելի է փոքր ճամպրուկ վերցնել ճամփորդության գնալիս, Հայաստանում դրա համար ժամանակ է անհրաժեշտ»:
Ռեւազյանը նաեւ ասաց՝ ավիատոմսը գնելը բավական չէ. «Եթե ուզում եք հստակ իմանալ, որ ձեր տեղը ամրագրված է օդանավի մեջ, դա էլ է ավել գումար»:
Մանրամասն՝ տեսանյութում
Կարդացեք նաև
Քաղավիացիայի կոմիտեի ղեկավարը խորհուրդ տվեց՝ մինչ ավիատոմսը գնելը, ավիաընկերության կայքի տեղեկատվությունն ուշադիր կարդալ, «լոուքոսթեր»-ի դեպքում քաղաքացին ինքն է իր տոմսը պատվիրում, եւ եթե որեւէ սխալ անի, ապա պատասխանատվությունն իր վրա է: Պետք է ուշադիր լինել՝ տոմսը գնելուց հետո, արդյոք ընկերությունը ձեր հաշվից համապատասխան գումարը հանել է, քանի որ լինում են դեպքեր, որ առցանց տոմս գնելիս, քաղաքացին կարծում է՝ գնել է այն, բայց երբ հասնում է օդանավակայան, պարզվում է՝ ընդամենը ամրագրել է, չի գնել:
Մանրամասն՝ տեսանյութում
Ռեւազյանի վստահեցմամբ՝ «լոուքոսթեր» ընկերությունները միաժամանակ մի քանի տարբեր ուղղություններ են բացում, եւ «Ryanair»-ը դրա ապացույցն է. «Արդեն որոշել են 6 ուղղություն բացեն եւ դրանով չի ավարտվելու: Մենք այսքանը կարողացել ենք անել լուրջ սահմանափակումներ ունենալու դեպքում: Մենք չունենք պայմանագիր ԵՄ-ի հետ, սա նշանակում է ԵՄ շուկան փակ շուկա է Հայաստանի համար: Մենք պայքարներով ենք գնացել»:
Մանրամասն՝ տեսանյութում
Ռեւազյանն ասաց՝ օդի տուրքը հանելուց հետո 16-17 ուղղություններ կլինեն դեպի Եվրոպա՝ ընդամենը 6-7 ուղղության փոխարեն:
Նելլի ԲԱԲԱՅԱՆ
