ՀՀ ոստիկանության պետի պաշտոնակատար Արման Սարգսյանը Tert.am-ի հետ զրույցում հերքել է տեղեկությունը, թե Սահմանադրական դատարանի երկու դատավորի նկատմամբ Ոստիկանության 7-րդ վարչությունը անձնական բնույթի տեղեկություններ է հավաքագրել:
-Պարոն Սարգսյան, ձեր ղեկավարած կառույցը տեղեկություններ է հավաքում Սահմանադրական դատարանի դատավորների նկատմամբ, ինչո՞ւ:
-Ոչ, չկա նման բան, որևէ նմանատիպ գործողություն չի կատարվում, սխալ լուր է, չի կարող նման բան լինել:
-Որևէ գործողություն չի կատարվո՞ւմ ՍԴ-ին առնչվող:
Կարդացեք նաև
-Ոչ, ՀՀ ոստիկանությունը որևէ նման գործողություն չի անում: Երեկ էլ գրել էին, թե գաղտնի հանդիպում է տեղի ունեցել վարչապետի հետ:
-Տեղի չի ունեցե՞լ գաղտնի հանդիպում ուժային ու իրավապահ մարմինների ղեկավարների մասնակցությամբ, Դուք չեք մասնակցե՞լ:
-Ոչ, որևէ հանդիպում չի եղել, ինչի մասին է խոսքը:
-Պարոն Սարգսյան, ՍԴ-ի մասին Դուք որևէ հրահանգ չեք ստացե՞լ:
-Իհարկե ոչ, ի՞նչ հրահանգի մասին է խոսքը, հանդիպում էլ չի եղել, հրահանգ էլ:
-Պարոն Սարգսյան, իսկ եթե առաջիկայում պարզվի, որ օրինակ` 7-րդ վարչությունը ՍԴ դատավորների մասին անձնական տվյալներն էր հավաքագրում, իսկ Դուք հիմա հերքում եք…
-Չի կարող պարզվել, հնարավոր չէ:
Հիշեցնենք` 168.am-ը տեղեկություն էր տարածել, թե Սահմանադրական դատարանի դատավորներից երկուսի հանդեպ առաջիկա օրերին, ամենայն հավանականությամբ, հրաժարական ներկայացնելու ուժեղ ճնշում կլինի՝ փորձելով հասնել նրան, որ նրանք հրապարակավ հայտարարեն, թե «կամովին» օգտվում են վաղ կենսաթոշակի օրենքից: Իսկ ըստ Hraparak.am-ի աղբյուրի` վարչապետ Նիկոլ Փաշինյանը Սահմանադրական դատարանի նախագահի ու դատավորների հարցով գաղտնի ժողով է հրավիրել, որին մասնակցել են իրավապահ կառույցների ղեկավարները:
