Այսօր Aravot.am-ը ԱԺ փոխնախագահ Լենա Նազարյանին «Իմ քայլը» խմբակցության անդամ Կարեն Սարուխանյանի՝ Սոֆիա Հովսեփյանին ուղղված վիրավորանքի հետ կապված հարցրեց՝ դուք գենդերային հավասարության ջատագովներից եք, կանանց դերի բարձրացման դիրքերից եք հանդես գալիս, ինչպե՞ս եք արձագանքում նրան, որ ձեր թիմակիցը հորդորում է կին պատգամավորին՝ «ամուսնացիր՝ կանցնի»: Այլ պարագայում, եթե նման արտահայտություն լիներ ոչ յուրային մեկ այլ տղամարդ պատգամավորի կողմից, անարգանքի սյունին կգամվեր նա, չկա՞ արդյոք խտրական մոտեցում այս առումով:
Լենա Նազարյանը պատասխանեց. «Ընդհակառակը, բոլոր այն դեպքերում, երբ նմանատիպ՝ կանանց անձնական կյանքը, կարգավիճակը թիրախավորող խոսք է հնչում հատկապես իմ թիմակցի կողմից, ես ավելի պարտավորված եմ զգում արձագանքել։ Նմանատիպ խոսքի հանդեպ իմ արձագանքը նախկինում էլի է եղել։ Փաստացի, հատկապես տղամարդկանց լսողությունը բավարար նրբանկատ չէ ուրիշի սխալների վրա սովորելու եւ իրենց խոսքը խմբագրելու համար։ Ցավոք, կանանց հակադարձելու եւ լռեցնելու տարածված միջոցը մնում է նրանց անձնական կյանքը թիրախավորելը։ Այ, այս ոճը հաստատ պետք է անցնի բոլորի մոտ։ Գործընկերներս Կարեն Սարուխանյանի հետ արդեն խոսել են։ Պատշաճ ներողությունը նման դեպքերում միակ արժանապատիվ ելքն է»:
Հռիփսիմե ՋԵԲԵՋՅԱՆ
