Հայաստանի Քաղաքացիական ավիացիայի կոմիտեն հերքել է Սիմֆերոպոլ-Երևան ուղիղ չվերթ բացելու վերաբերյալ ռուսական մամուլում տարածված տեղեկատվությունը: Քաղավիացիայից Infocheck-ին հայտնել են, որ ավիաընկերության հետ նման քննարկումներ տեղի չեն ունեցել, որևէ հայտ չի ներկայացվել, հետևաբար ավիափոխադրումների մասին խոսելն ավելորդ է։
Ավելի վաղ նման տեղեկատվություն տարածել էին ռուսական լրատվամիջոցները: Մասնավորապես, «ՌԻԱ Նովոստին», զրուցել էր Ղրիմի խորհրդարանի՝ զբոսաշրջության, առողջարանների և սպորտի կոմիտեի ղեկավար Ալեքսեյ Չերնյակի հետ:
«Ղրիմի և Հայաստանի միջև պարբերական ավիաչվերթները նախատեսվում է գործարկել ընթացիկ տարվա մարտից: «Իկար» ավիաընկերությունն արդեն ստացել է պարբերական թռիչքների վերաբերյալ համապատասխան թույլտվությունը և համաձայնությունը Ռոսավիացիայից: Այժմ հարցը գտնվում է նախապատրաստման և համաձայնեցման փուլում, այդ թվում չվացուցակի և օդանավակայանների հետ պայմանագրերի մասով: Չվերթները նախատեսվում են մարտից՝ շաբաթական երկու անգամ: Հետագայում՝ ըստ պահանջարկի, բայց ոչ ավել, քան շաբաթական 7 անգամ»,- ասել էր Չերնյակը:
Նրա խոսքով՝ Սիմֆերոպոլի և Երևանի միջև չվերթը կդառնա առաջին պարբերական միջազգային չվերթը «Ռուսաստանի հետ Ղրիմի վերամիավորումից հետո»:
Կարդացեք նաև
«Դա լավ օրինակ կլինի Չինաստանի և Թուրքիայի և մյուս երկրների ու ավիաընկերությունների համար: Պարբերական ավիահաղորդակցության բացումը սկիզբ կդնի Ղրիմից առաջին միջազգային չվերթներին և էլ ավելի կամրապնդի Սիմֆերոպոլի օդանավակայանի միջազգային կարգավիճակը»,- ասել էր նա:
Պատրաստեց՝ Վիկտորյա ԱՆԴՐԵԱՍՅԱՆԸ
