Պողոսյան հիմնադրամի բրյուսելյան կենտրոնում՝ Վիլլա Ամպանում, նոյեմբերի կեսերին բացված այս ցուցահանդեսը կգործի այսօր և վաղը, ապա նախատեսված է նրա փակումը։
Ցուցադրանքի կոնցեպցիայի հիմքում Բեյրութի լքված տներն են։ Հեղինակը Բեյրութում բնակվող և ստեղծագործող 48-ամյա արվեստաբան, լուսանկարիչ և կինոռեժիսոր Գրիգոր Պուչաքճեանն է (Gregory Buchakjian)։ Այս թեմայով նա դոկտորական թեզ է պաշտպանել Փարիզի Սորբոնի համալսարանում. աշխատության գլխավոր հարցադրումն է, թե ինչպես կարող էր Լիբանանի, ընդհանրապես արաբական աշխարհի քաղաքական անկայունությունը հանգեցնել լքված բնակավայրերի «սինդրոմին» երբեմնի ծաղկուն Բեյրութում։ Պուչաքճյանը Լիբանանի արվեստի ակադեմիայի վիզուալ արվեստների դպրոցի տնօրենն է։ Վիլլա Ամպանի հասցեի, ցուցահանդես այցելելու ժամերի և այլ մանրամասների համար այցելեք հետևյալ էջը:
Վիլլա Ամպանում այժմ գործող ցուցահանդեսներից մյուսը Ekphrasis, l’écriture dans l’art-ն է, որին մասնակից 40 նկարիչները միավորվել են արվեստական պատկերները տեքստերով, գրություններով լրացնելու փորձարարական մեթոդի ներքո։ Ցուցահանդեսը գործելու է մինչև 2020թ. փետրվարի 9-ը։
«Պողոսյան» հիմնադրամը 2010 թվականին Բրյուսելում որպես իր կենտրոնակայան վերանորոգեց Վիլլա Ամպանը և այնտեղ հիմնեց Արևելքի ու Արևմուտքի մշակույթների երկխոսության կենտրոն, որն իր մշակութային, գեղարվեստական, գիտական և կրթական նախագծերի շնորհիվ դարձել է համաեվրոպական նշանակության արվեստի կենտրոն։
