Սիրելի հայրենակիցներ.
Նախ ցանկանում եմ Ամանորի, Սուրբ ծննդյան տոների առիթով շնորհավորել Ձեզ, մաղթել առողջություն, անսպառ եռանդ, հաջողություններ Ձեր կյանքի, գործունեության բոլոր ոլորտներում:
Անկախ տարիքից, գտնվելու վայրից, մեր հայացքներից, մոտեցումներից մենք բոլորս էլ մեր ժողովրդի հարազատ զավակներն ենք: Եվ ամեն մի նոր տարվա շեմին պարտավոր ենք մեզ հարցնել՝ մենք ինչ ենք անելու մեր ծնողի համար: Մենք ինչ ենք անելու, որ նա ոչ միայն այս նոր տարին, այլ դարերի մեջ էլ կարողանա հարատևել, զարգանալ: Որ իրավունք ունենա, կարողանա իր արժանի տեղն ու դերը գրավել քաղաքակրթական արդի զարգացումներում և այսօր էլ, վաղն էլ իր որդիների, դուստրերի համար արժանապատիվ ապրելու նպաստավոր պայմաններ ստեղծի:
Նոր տարին, նոր հնարավորությունների տարի է: Եվ անկախ նրանից, թե անցնող տարում ինչ խնդիրներ, տարաձայնություններ են ծագել, եթե նպատակը սուրբ է մենք պարտավոր ենք մի կողմ դնելով մանր մունր վեճերը նորից անդրադառնալ, քննարկել թե ինչպես և ինչ կարելի է անել մեր երկրի, մեր Հայոց աշխարհի համար:
Կարդացեք նաև
2020 այս թվականը աշխարհասփյուռ մեր ողջ ժողովրդի համար իրոք բեկումնային տարի կարող է դառնալ: Օգտվելով աշխարհքաղաքական մեզ համար խիստ բարենպաստ իրավիճակից, հեռահաղորդակցման, հեռակապի, արդի նվաճումներից, լուծելով ընդամենը որոշ կազմակերպչական խնդիրներ՝ ժամանակն է և կարող ենք մենք էլ վերջապես սկսենք աշխարհով մեկ ձևավորել սահմաններ չճանաչող մեր հզոր Ազգ կազմակերպությունը՝ համազգային կառույցների մեր միաձույլ համակարգը իր կենտրոն, մայրաքաղաք Հայաստան պետությամբ:
Խանգարող լուրջ հանգամանքներ ներկայումս իրոք չկան: Մեկնարկը հնարավորինս շուտ պետք է տրվի: Եվ տա Աստված, որ Ձեր ակտիվ մասնակցությամբ համատեղված մեր ջանքերը հաջողությամբ պսակվեն:
Նորից եմ Ձեզ մաղթում ամենայն բարիքներ:
Արշակ ՍԱԴՈՅԱՆ
ԱԶԳԱՅԻՆ ՀԱՄԱԳՈՐԾԱԿՑՈՒԹՅՈՒՆ ՀԻՄՆԱԴՐԱՄԻ ՏՆՕՐԵՆ
