Երեկ Երեւանի ավագանու նիստին, որը տեւել է մոտ 12 ժամ, «Իմ քայլ»-ը խմբակցության անդամ Մարատ Թոխյանն երեկոյան հերթագրվել էր հարց տալու, եւ երբ հասավ իր հարց տալու ժամանակը, նա ասաց.
«Ճիշտն ասած, ես բավականին հոգնեցի այս մթնոլորտից: Անգամ հարցը չեմ ուզում տալ, այս կրկեսի վերածած բեմադրությունը, էս մատ թափ տալը, էդ վիրավորելը: Մի քանի անգամ խոսել էինք, որ էթիկայի հանձնաժողով, բան: Բայց ինձ թվում է էս «սիտուացիայում» էթիկայի հանձնաժողովն էլ չի օգնի: Ես ուղղակի դիմում եմ ձեզ, պարոն քաղաքապետ, մի բան անել, որ կարողանանք նորմալ, հանգիստ աշխատենք այստեղ: Այդ ռեպլիկաները, որոնք ամեն անգամ ես այստեղ հետեւից լսում եմ, երեւի, մյուս անգամ ականջակալներով գամ այստեղ»:
Թոխյանը նկատի ուներ «Լույս» խմբակցության անդամներին, որոնք երեկ ժամանակ առ ժամանակ ռեպիլիկներ էին անում, Կենտրոն վարչական շրջանի ղեկավար Ավետ Պողոսյանի հետ հարց ու պատասխանի ժամանակ վիրավորական արտահայտություններ անում:
«Խուլիգանություն է սա, սենց ասեմ»,-ասաց Թոխյանը: Հետեւի շարքերից կրկին ռեպլիկներ էին հնչում Թոխյանի՝ Արթուր Մեսչյանին հարց տալու ժամանակ:
Կարդացեք նաև
Թոխյանը խոսափողից մի փոքր հեռու նստեց եւ «Լույս»-ի անդամների հասցեին ասաց. «Խուլիգաններ են, արա, «նատուրի» խուլիգաններ են»:
Բայց ի վերջո, Թոխյանն իր հարցն ուղղեց Երեւանի գլխավոր ճարտարապետին:
Նելլի ԲԱԲԱՅԱՆ
