Ռուսական ORSIS սպառազինության ընկերությունն առաջընթաց է տեսնում Հայաստանին ռազմատեխնիկա մատակարարելու տապալված տենդերի հետ կապված իրավիճակում: Այս մասին գրում է «ՌԻԱ Նովոստին»՝ վկայակոչելով ձեռնարկության պաշտոնական ներկայացուցչին:
«Այսպես, դատարանի որոշմամբ ORSIS-ը դուրս են հանել մատակարարների սև ցուցակից: Սա դրական միտում է, քանի որ հնարավորություն է տալիս շարունակել մեր ընկերության գործակցությունը Հայաստանի հետ, իսկ հանրապետությանը, որը մեր հին գործընկերն է՝ ստանալ ժամանակակից և որակյալ զենք»,- ասել է գործակալության զրուցակիցը:
Նա անդրադարձել է նաև հայկական լրատվամիջոցներում տարածված այն տեղեկատվությանը, որ Հայաստանի ՊՆ-ից բարձրաստիճան պաշտոնյաներ են հեռացվել ORSIS-ի հետ կապված իրավիճակի պատճառով:
«Ընկերությունում կարծում են, որ տենդերի տապալման հիմնական մեղավորները դեռ պատիժ չեն կրել: Մինչ այժմ անհասկանալի են հանդիպման առաջարկի վերաբերյալ գերատեսչության կողմից պաշտոնական պատասխանի բացակայության դրդապատճառները: Ընկերությանը տեղեկություններ են հասնում, որ նախարարության կոնկրետ պաշտոնյաներ յուրացրել են ORSIS ընկերության նվիրաբերած ՄՕ նմուշները»,- ասել է ընկերության ներկայացուցիչը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
