Հայաստանի տնտեսական ցուցանիշները ուժեղ են առողջ աճով, ցածր գնաճով, կայուն ֆինանսական համակարգով, արտաքին պահուստների աճով և ավելի բարձր եկամուտներով: Չնայած հարկաբյուջետային գերակատարմանը՝ կարևոր է պահպանել բարեփոխումների թափը՝ եկամուտների հավաքագրումն ամպրապնդելու, այդ թվում գույքի հարկման ոլորտում բարեփոխումներն ավարտին հասցնելու համար: Իշխանությունների բարեփոխումների օրակարգի իրականացումը, այդ թվում կառավարման բարելավմանն ուղղված ջանքերը` ստեղծելու կոռուպցիայի դեմ պայքարի ամբողջական ծրագիր, կնպաստեն կայուն և ներառական աճի: Այս մասին ասվում է Արժույթի միջազգային հիմնադրամի՝ «Սթենդ-Բայ» վարկային պայմանավորվածության (SBA) Հայաստանի կատարողականի առաջին ամփոփման շրջանակում տրված գնահատականում:
«Հայաստանի տնտեսական ցուցանիշները ուժեղ են՝ առողջ աճով, ցածր գնաճով, կայուն ֆինանսական համակարգով և բարելավվող արտաքին ու հարկային բուֆերներով: Պետական պարտքը շարունակում է մնալ նվազող հետագծի վրա, և ակնկալվում է, որ Հայաստանը կհասնի իր միջնաժամկետ պարտքի թիրախին սպասվածից մի քանի տարի շուտ: Այս բարենպաստ դիտարկումը հնարավորություն է տալիս արագացնել բարեփոխումների ջանքերը` ի նպաստ ավելի հավասարակշռված և ներառական աճի, աղքատության և գործազրկության անկման»,- ասվում է հայտարարության մեջ:
Դրանում նշվում է, որ 2019թ. հարկաբյուջետային արդյունքը գերակատարել է բյուջեն ՝ արտացոլելով ինչպես ակնկալվածից բարձր եկամուտներ, այնպես էլ ակնկալվածից ցածր կապիտալ ծախսեր: Կապիտալ ծախսերի կատարման ամրապնդումը, պետական ներդրումների կառավարման գործընթացին համահունչ, շարունակում է մնալ գերակայություն: Չնայած հարկաբյուջետային գերակատարմանը, բարեփոխումների թափը պետք է պահպանվի՝ եկամուտների հավաքագրումը բարելավելու համար, այդ թվում ավարտին հասցնելով հարկման ոլորտում բարեփոխումները և հետագայում ամրապնդելով եկամուտների կառավարումը: Բյուջետային գործընթացի խթանումը նաև հետագայում կնպաստեր հարկաբյուջետային կանոնների նկատմամբ վստահելիությանը:
ԱՄՀ մասնագետները կարծում են, որ գների կայունության վրա կենտրոնացած դրամավարկային քաղաքականության շրջանակը լավ է անդրադարձել Հայաստանի վրա: Իշխանությունների կողմից Բազել III- ի սկզբունքների իրականացումը կբարձրացնի ֆինանսական համակարգի կայունությունը, մյուս կողմից ողջունելի են նաև կապիտալի շուկայի զարգացման և ֆինանսների հասանելիության բարելավման նրանց ծրագրերը:
Կարդացեք նաև
«Իշխանությունների բարեփոխումների օրակարգի իրականացումը կնպաստի կայուն և ներառական աճի: Կոռուպցիայի դեմ պայքարի համապարփակ շրջանակ ստեղծելու միջոցով կառավարման բարելավմանն ուղղված ջանքերը շարունակվում են: Իշխանությունները նաև վերահաստատել են իրենց հանձնառությունը`պաշտպանել առավել խոցելիներին` ընդլայնելով և ավելի լավ թիրախավորելով նրանց սոցիալական ապահովության ցանցը: Մարդկային կապիտալի ամրապնդման և կանանց աշխատուժի մասնակցության բարձրացման ուժեղացված քայլերը իշխանությունների երկարաժամկետ կառուցվածքային օրակարգի առանցքային կետերից են»,- ասվում է հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
