Այսօրվանից սիգի ապօրինի որսն արգելված է
Շրջակա միջավայրի նախարար Էրիկ Գրիգորյանն այսօր տարեվերջյան ասուլիսում պատասխանելով հարցին, թե ինչո՞ւ նախարարությունը սիգի որսի դեմ արդյունավետ պայքար չի մղում եւ չնայած նրան, որ սիգի որսն արգելված է, բայց փողոցներում ամենուր սիգ են վաճառում, ասաց, որ բավարարված չէ «Սեւան» ազգային պարկի հսկողությամբ, ինչի համար կան նաեւ օբյեկտիվ պատճառներ:
«Սեւան» ազգային պարկի աշխատակիցները, բնականաբար, պետք է շատ ավելի ջանասիրաբար աշխատեն, բայց կան օրենսդրական սահմանափակումներ՝ աշխատանքն ավարտվում է ժ. 18-00-ին: Շաբաթ-կիրակի էլ չեն աշխատում»:
Նախարարը հայտնեց, որ «Սեւան» ազգային պարկի տնօրենն ազատվել է պաշտոնից, իսկ ավելի քան 10 աշխատակցի նկատմամբ քրեական գործեր են հարուցվել, նրանց մեջ են նաեւ տեղամասերի ղեկավարները:
Կարդացեք նաև
«Որեւէ աշխատակից, որ ոչ իրավաչափ գործողություն կկատարի, առաջին շահագրգիռ կառույցը եւ մարմինը մենք ենք, որ օր առաջ բացահայտվի, սակայն նաեւ օրենսդրական որոշակի խնդիրներ կան, որ փորձում ենք լուծել: Դրանցից մեկը վաճառքի հետ կապված սահմանափակումներն են: Մենք տեսնում ենք մայթերում վաճառվող սիգ, ինչն ապօրինի է»:
Էրիկ Գրիգորյանը քաղաքացիներին հորդորեց ձվադրած ձկները չգնել, այդպիսով նպաստելով, որպեսզի ձվադրման շրջանում որսը սահմանափակվի:
Ըստ նախարարի, սիգի ապօրինի որսն արգելելու նպատակով այսօրվանից ուժեղացված հսկողություն է իրականացվելու, պայքարող կառույցներին՝ ոստիկանությանը, բնապահպանական տեսչական մարմնին, Գեղարքունիքի մարզպետարանին կմիանա նաեւ Պետական եկամուտների կոմիտեն:
«Երբ նույն այդ ձուկը սուպերմարկետում կամ ռեստորանում է՝ թվացյալ օրինական է, քանի որ այդ տնտեսվարողը հարկ է վճարում, կարծես դրանով օրինականացնում է, իսկ վաճառողը` ոչ: Հիմա այդ սողանցքները եւս կփակվեն, այս փաթեթն ավարտելու դեպքում սիգի որսը հնարավոր կլինի կանոնակարգել եւ բերել օրենսդրական դաշտ»,- ասաց Էրիկ Գրիգորյանը՝ նշելով, որ մինչ օրս եղել է մի համակարգր, որը ֆորմալ առումով ունեցել է կարգավորումներ, բայց ուներ նաեւ բազմաթիվ սողանցքեր:
Լուսինե ԲՈՒԴԱՂՅԱՆ
