«Դաշնակցության Գերագույն մարմնում քննարկել ենք. 2019-ը համարում ենք յոթ ռիսկերի խորացման տարի»,- «Պոլիտէկոնոմիա» հետազոտական ինստիտուտի կազմակերպած «Հետհեղափոխական Հայաստան․ի՞նչ տեղի ունեցավ և ի՞նչ է սպասվում» խորագրով համաժողովին հայտարարեց ՀՅԴ ԳՄ անդամ Արծվիկ Մինասյանը:
Արծվիկ Մինասյանը մարտահրավերներից առանձնացրեց արտաքին քաղաքականության ոլորտում գրանցված ձախողումները, հայոց բանակի նկատմամբ թիրախային հարվածները, ԼՂ խնդրի կարգավորման շրջանակում արձանագրված ձախողումներն ու պատերազմի սպառնալիքը, իրավական պետության ոտնահարման գործընթացները: Այս առիթով նա ասաց. «Վերջին հարձակումը, որ վարչապետի կողմից կազմակերպվեց, վկայությունն է նրա, որ պետական կառավարման համակարգը, ինստիտուտները լիարժեք ու ամբողջությամբ ձախողված վիճակում են»:
Արծվիկ Մինասյանը մտահոգություն հայտնեց, թե հայրենիքի պաշտպանության համար զոհվածը համարվում է անիմաստ զոհ, ոտնահարվում է այն արժեքային համակարգը, որ ձևավորել է մեզ որպես քրիստոնյա. «Պատահական չէ եկեղեցու սպասավորի նկատմամբ վարչապետի հոխորտանքը և զուգահեռաբար եկեղեցու նկատմամբ հարձակումները: Սրանք այդ ինստիտուտը ոչնչացնելու նպատակ ունեն: Նոր Հայաստան բառակապակցությունը, որը նետվեց բառապաշար՝ նպատակ ուներ ոչնչացնել այս ինստիտուտները»:
Ամփոփելով Արծվիկ Մինասյանն ասաց. «Այս ամենը, ցավոք, հանգեցնում է այն եզրակացության, որ այսօրվա իշխանությունը չունի արժեքային համակարգ: Պատահական չէ, որ չունենալով արժեքային համակարգ՝ այս իշխանությունը չունի նաև գաղափարախոսություն: Դեռ 2019-ի սկզբում, երբ ձևավորվում էր այս կառավարությունը, մենք ասում էինք դրա մասին»:
Կարդացեք նաև
Տաթև ՀԱՐՈՒԹՅՈՒՆՅԱՆ
