«Սերժ Սարգսյանը հայաստանակենտրոն գործիչ եղել է, կա եւ կմնա: Նա որեւէ մեկին, բացի իր ժողովրդից, որեւէ խոստում չի տվել, նման հրապարակումներն ուղղակի զավեշտալի են»,- այսօր հրավիրված մամուլի ասուլիսում, պատասխանելով Aravot.am-ի հարցին, ասաց ՀՀԿ խոսնակ, ԱԺ նախկին փոխնախագահ Էդուարդ Շարմազանովը:
Հիշեցնենք, քաղաքական կուլիսներում տեսակետ է շրջանառվում, թե 2008 թվականի ընտրություններում Սերժ Սարգսյանը եղել է Արեւմուտքի թեկնածուն եւ այն ժամանակ խոստումներ էր տվել, որոնք չկատարեց: Վերջերս նման գրառում էր կատարել նաեւ քաղաքագետ Ստեփան Դանիելյանը: Էդուարդ Շարմազանովը նման խոսակցությունները պարզապես զավեշտալի է համարում:
Խոսելով ՀՀԿ-ի անելիքների մասին էլ, Էդուարդ Շարմազանովն ասաց, որ ՀՀԿ-հիմնադիրները մշտապես պայքարով են անցել, բայց վերջին տասնամյակներում կուսակցությանը մշտապես եղել է իշխանական դաշտում, կառուցողական-ընդդիմադիր գործունեությունն իրենց համար նոր է. «Բայց մի բան ուրախալի է`ՀՀԿ-ն պատվով է իրականացնում իր դերը»:
Թեեւ սոցիոլոգիական հարցումներին բանախոսը չի վերաբերվում իբրեւ վերջին ատյանի ճշմարտություններ, բայց վերջին շրջանի բոլոր հարցումներում մեկ օրինաչափություն է արձանագրել`Նիկոլ Փաշինյանի եւ նրա իշխանության հիմնական ընդդիմադիր ուժը ՀՀ քաղաքացիները տեսնում են ՀՀԿ-ին. «ՀՀԿ-ն շարունակում է մնալ Նիկոլ Փաշինյանի իշխանության հիմնական ընդդիմադիրը եւ չորս ամենաընդդիմադիր գործիչները ՀՀԿ-ից են, այդ թվում նաեւ`ձեր խոնարհ ծառան»:
Կարդացեք նաև
Լրագրողներից մեկը խնդրեց գնահատել խորհրդարանական ընդդիմության գործունեությունը:
Էդուարդ Շարմազանովը կոռեկտ չհամարեց գնահատել խորհրդարանական ընդդիմության գործունեությունը. «Ինձ կարող է բավարարել, կարող է չբավարարել, կարեւորը`հանրությանը բավարարի: Ես հարգանքով եմ վերաբերվում բոլոր քաղաքական ուժերին`անկախ նրանից, թե նրանք ինչ ցեխ են շպրտում ՀՀԿ-ի վրա: Չնայած, ինչ կշպրտեն, երկու անգամ ավելի կստանան: Բայց մենք կարծում ենք, որ ժամանակն է մտնել գաղափարական պայքարի փուլ»: Ինչեւէ, բանախոսի կարծիքով, խնդիրը ոչ ԲՀԿ-ի մեջ է, ոչ էլ ԼՀԿ-ի, թեեւ, դասական առումով, իր համար ընդդիմադիր են այն ուժերը, որոնք «չեն ողջունել Նիկոլի իշխանազավթումը»:
Թե ԲՀԿ-ն, թե ԼՀԿ-ն, իր գնահատմամբ`«ուզած-չուզած ընդդիմություն են», քանի որ սկզբում իշխանության հետ եղել են կոալիցիա, ապա, անցել ընդդիմադիր դաշտ`սահմանադրությունն է այդպես պահանջում: Բայց Էդուարդ Շարմազանովի գնահատմամբ, Հայաստանում այսօր այնպիսի անհեթեթ իրավիճակ է ստեղծվել, որ եւ Գագիկ Ծառուկյանը, եւ Էդմոն Մարուքյանը որքան էլ խոսեն, ոչինչ չեն փոխելու:
Մանրամասները`տեսանյութում
Նելլի ԳՐԻԳՈՐՅԱՆ
