Aravot.am-ը Գիտության պետական կոմիտեի նախկին նախագահ Սամվել Հարությունյանից հետաքրքրվեց` ի՞նչ փուլում է իր եւ Իրազեկ քաղաքացիների միավորման ծրագրի համակարգող Դանիել Իոաննիսյանի դատական վեճը: Հիշեցնենք, որ Դանիել Իոաննիսյանը Հարությունյանին մեղադրել էր կոռումպացվածության մեջ, ինչի պատճառով էլ Գիտպետկոմի նախկին նախագահը նրան դատի էր տվել:
«Դանիել Իոաննիսյանին ես լուրջ մարդ չեմ համարում: Լինելով ֆիզիկոս` նա բոլոր հարցերում դարձել է փորձագետ, սկսած գինեկոլոգիայից, վերջացրած իրավական խնդիրներով: Լուրջ մարդը չի կարող այդպիսին լինել: Որ նրա անունը հաճախ հնչեցնում են, ես ուղղակի զարմանում եմ, Հայաստանում ավելի հետաքրքիր մարդիկ չկա՞ն: Բազմաթիվ շնորհքով մարդիկ ունենք, լուրջ գիտնականներ, քաղաքական գործիչներ, բայց նրա անունն ավելի շատ է շոշափվում, երբ այդ մարդն իրենից ոչինչ չի ներկայացնում: Նոր Հայաստանում Դանիել Իոաննիսյանի նման մարդիկ պետք է տեղ չունենային, նրա միակ զբաղմունքը սրա-նրա վրա ցեխ շպրտելն է ու անհիմն մեղադրանքներ հնչեցնելը»,- ասաց Սամվել Հարությունյանը: Հավելեց, որ ինքը դատը շահել է, սակայն Իոաննիսյանը վճիռը բողոքարկել է:
«Դանիել Իոաննիսյանը Բուլգակովի ինչ-որ հերոսի է հիշեցնում, նրա մասին չգիտես ինչու են այդքան խոսում, երբ կան հզոր գիտնականներ ու քաղաքական գործիչներ: Թող մեկը բացատրի` այդ մարդն այս պետության համար ի՞նչ արտառոց բան է արել, որ նրա անունն այդքան շոշափվում է»,- ասաց մեր զրուցակիցը:
Գոհար ՀԱԿՈԲՅԱՆ
Հիմա ցեխ շպրտողը պահանջված մասնագետ է….