Ապրիլյան ռազմական գործողությունների հանգամանքներն ուսումնասիրող ԱԺ քննիչ հանձնաժողովն առաջիկայում հարցեր է հղելու ներկա եւ նախկին բարձրաստիճան պաշտոնյաների, զինվորականների, այդ թվում՝ գերագույն գլխավոր հրամանատարին: Այս մասին այսօր «Պոստ սկրիպտում» մամուլի ակումբում լրագրողների հետ հանդիպմանն ասաց հանձնաժողովի անդամ, «Իմ քայլը» խմբակցության պատգամավոր Տիգրան Կարապետյանը: Նրա խոսքով՝ հրավիրյալ պաշտոնյաներն առանցքային դեր են ունեցել՝ հրամաններ տալու եւ որոշումներ կայացնելու առումով:
Հետաքրքրվեցինք՝ Անդրանիկ Քոչարյան-Ռուբեն Հայրապետյան բանավեճի եւ հանձնաժողովի առաքելության միջեւ կապ տեսնո՞ւմ է:
https://www.facebook.com/aravot.am/videos/2421696424747168/
Տիգրան Կարապետյանը պատասխանեց, որ Քոչարյանի դեմ սկսված գործընթացը որոշակի առնչություն ունի նաեւ «ապրիլյան» հանձնաժողովի աշխատանքի հետ. «Անընդհատ կեղծ լուրեր են տարածում, թե մենք պատժիչ գործողությունների նպատակ ունենք, ուզում ենք բանակը թուլացնել, բայց մենք միշտ ասել ենք, որ հանձնաժողովը որեւէ մեկին պատժելու գործառույթ չունի: Ասում են, որ ապրիլյանի ժամանակ զինվորը փամփուշտ չի ունեցել: Մեր նպատակն է հարցերին պատասխան տալ, եւ հանձնաժողովի աշխատանքի արդյունքում հայտարարեցինք, որ առաջնագծում փամփուշտ եղել է: Ասացին, թե ծածկադմբոց ենք անում, բայց մենք փաստերով ենք խոսում»:
Կարդացեք նաև
Պատգամավորի խոսքով՝ նշյալը չի ենթադրում, թե այս ընթացքում որեւէ պաշտոնյանի հանցավոր անգործություն արձանագրելու դեպքում իրենք չեն դիմելու իրավապահներին: «Մենք ապաքաղաքական ենք, եւ մեր ընդդիմադիր գործընկերներն էլ են այդ սկզբունքը պահում, ինչի համար շնորհակալ ենք»,-եզրափակեց Տիգրան Կարապետյանը:
Լուիզա ՍՈՒՔԻԱՍՅԱՆ
