«Կարդացել եմ հոդվածը: Բավականին հետաքրքիր էր այն առումով, որ նյութը գրվել է մարդկանց կողմից, որոնք տեղեկություն են ստացել եւ այն չեն ճշտել»,-«Պոստ սկրիպտում» մամուլի ակումբում լրագրողների հետ հանդիպմանն այսօր ասաց «Իմ քայլը» խմբակցության պատգամավոր, ապրիլյան ռազմական գործողությունների հանգամանքներն ուսումնասիրող ԱԺ քննիչ հանձնաժողովի անդամ Տիգրան Կարապետյանը՝ անդրադառնալով մամուլի հրապարակումներին այն մասին, որ ինքը նախկինում Սերժ Սարգսյանի հովանավորչության ներքո է եղել եւ այսօր էլ է այսպես, եւ որ Սյունիքի նախկին մարզպետ Սուրիկ Խաչատրյանի դեմ իր ելույթները Սերժ Սարգսյանի «դաբրոյով» են եղել:
https://www.facebook.com/aravot.am/videos/2421696424747168/
«Շատ չէի ուզենա մանրամասնել, որպեսզի «չլրջացնեմ» այդ հոդվածը: Դա անիմաստ է եւ զավեշտալի: Երեւի համաձայնեցվա՞ծ էր, երբ իմ տունը խուզարկում էին, երբ Գորիսում բարեկամներիս ազատում էին աշխատանքից»,-նշեց Տիգրան Կարապետյանը, որը նախկինում եղել է Գորիսի քաղաքապետի թեկնածու:
Ինչ վերաբերում է Գորիսի քաղաքապետի նախկին թեկնածու Արա Բուդաղյանի հետ հարաբերություններին, Կարապետյան ասաց, որ տասնյակ տարիների ընկերներ են:
Կարդացեք նաև
Պատգամավորի խոսքով՝ այդ հոդվածում ճշմարիտ է միայն այն, որ իր ղեկավարած ընկերության գլխավոր ինժեներ-կոնստրուկտորը Սերժ Սարգսյանի հետ լուսանկար ունի. «Նրան պարգեւատրել են որպես լավագույն մեխանիկ-կոնստրուկտորի: Այդ նկարը մենք չենք հանել եւ չենք էլ հանելու մեր կայքից: 2014թ.-ին ինձ զանգեցին Բաղրամյան 26-ից եւ ասացին, որ ինձ ներկայացրել են «Երախտագիտության» մեդալի՝ մեքենաշինության ոլորտում հաջողություններ ունեցող ընկերություն ունենալու համար: Ասացի, որ հրաժարվում եմ: Մեր կոնստրուկտորը 50 տարվա փորձ ուներ, ճիշտ կլիներ հենց կոնստրուկտորի թեկնածությունը ներկայացնել: Նա իսկապես արժանի էր»:
Լուիզա ՍՈՒՔԻԱՍՅԱՆ
