«Ադրբեջանը պատրաստվում է պատերազմի, Հայաստանը՝ ոչ»,- այսօր «Ոսկանապատ» վերլուծական կենտրոնի կազմակերպած «Բանակցային գործընթացը եւ Հայաստանի արտաքին քաղաքական միջավայրը» թեմայով քննարկման ժամանակ, ասաց կենտրոնի ղեկավար, վերլուծաբան Հրանտ Մելիք-Շահնազարյանը: Բանախոսի գնահատմամբ, վարչապետ Նիկոլ Փաշինյանի հայացքը բացառապես ներքին խնդիրներին է ուղղված: Արտաքին ռիսկերի գնահատման մեխանիզմներ նա չունի, չկան այդ մարդիկ, եւ, առհասարակ, այդ օրակարգը ՀՀ առջև դրված չէ. «Չկան այդ ռիսկերին դիմակայելու տրամադրվածությունն ու ցանկությունը, անգամ գիտակցումը չկա, որ դրան պետք է պատրաստվել: Մենք կանգնած ենք պատերազմի նախաշեմին: Հանրությունը պիտի դա իմանա ու նախապատրաստվի դրան»:
Նրա գնահատմամբ, Հայաստանում դեռ կա հանրության բավական մեծ զանգված, որը կուրորեն հավատում է Նիկոլ Փաշինյանի շուրթերից հնչող ցանկացած խոսքի ու հավատում է`քանի որ մենք ժողովրդավար պետություն ենք, Ադրբեջանը երբեք չի փորձելու հարձակվել Արցախի վրա, իսկ արցախյան հակամարտությունն էլ լուծվելու է այնպես, ինչպես թելադրում կամ պատկերացնում է Նիկոլ Փաշինյանը: Մինչդեռ, ըստ նրա, Ադրբեջանի վերջին մեկուկես տարվա գործողությունները ցույց են տալիս, որ վերջինս պատրաստվել է պատերազմի, հասել է նրան, որ վերացրել է Վիեննայի և Սանկտ Պետերբուրգի պայմանավորվածությունները`դրանք փոխարինելով «վերելակային կարճ, ոտքի վրա ձեռք բերված պարտավորություններով». «Բանակցային գործընթացում միջնորդներն ու Ադրբեջանը խոսում են մեկ լեզվով, իսկ ՀՀ իշխանություններն այդ համագործակցության շրջանակներից դուրս է հայտնվել: Ըստ էության, մեր պետական դիրքորոշումը միջազգային հանրությանը հակադրվում է: Դրան հասնելու համար Ադրբեջանին մեծ ջանքեր պետք չեն եղել: Ադրբեջանն օգտվել է նրանից, որ ՀՀ նոր իշխանությունները գաղափար չունեին բանակցային գործընթացի տրամաբանությունից, գոյություն ունեցող վտանգներից»:
Այլ մանրամասները`տեսանյութում
Կարդացեք նաև
Նելլի ԳՐԻԳՈՐՅԱՆ
