«Ղարաբաղի ադրբեջանական համայնքի» անունից Ալիեւն արդեն իսկ բանակցում է
«Նրանց հարցը նախկինում էլ է եղել: Հիմա ակտիվացել են, որովհետեւ հայկական կողմն էլ ակտիվացրել է Արցախի՝ բանակցային սեղանի շուրջը մասնակցություն ունենալու հարցը»,-ՀՅԴ բյուրոյի հայ դատի եւ քաղաքական հարցերի գրասենյակի ղեկավար Կիրո Մանոյանն «Առավոտ»-ի հետ զրույցում այսպես է մեկնաբանում Ադրբեջանից հնչող ակնարկները՝ այսպես կոչված «Ղարաբաղի ադրբեջանական համայնքի» ներկայացուցիչներին հակամարտության կարգավորման բանակցություններում ներգրավելու պահանջի վերաբերյալ:
Կիրո Մանոյանի բնորոշմամբ. «Նրանք փորձում են հավասարություն դնել, բայց, բնականաբար, հավասարություն չի կարող դրվել, որովհետեւ, նախ, զինադադարի փաստաթղթի տակ այդ «համայնքի» ստորագրությունը չկա: Բացի այդ, նրանք արդեն իսկ ունեն բանակցություններում իրենց ներկայացուցչին՝ Իլհամ Ալիեւին: Իսկ արդյունավետության տեսանկյունից նրանց մասնակցությունն անիմաստ է: Եթե ուզում են մասնացել, իրենց պատվիրակության հետ թող բերեն, բայց բանակցությունների կողմ չեն կարող լինել: Եթե իհարկե պատվիրակության մասին է խոսքը: Բայց եթե սեղանի շուրջ են նստում ՀՀ վարչապետը, Ադրբեջանի նախագահն ու Արցախի նախագահը, այդ համայնքն այդտեղ ի՞նչ է անելու: Այն դերակատարում չունի»:
Լուիզա ՍՈՒՔԻԱՍՅԱՆ
Կարդացեք նաև
«Առավոտ» օրաթերթ
21.12.2019
