Գյումրիում տեղակայված 102-րդ ռուսական ռազմաբազան, ըստ Միջազգային հարցերով ռուսական խորհրդի փորձագետ Լեոնիդ Ներսիսյանի, կարող է լավ հիմք դառնալ հայ-ռուսական ռազմական արդյունաբերության զարգացման համար, քանի որ ռազմաբազայում կա բավական մեծ թվով վերանորոգման կարիք ունեցող զինտեխնիկա, որը ՌԴ տեղափոխել եւ ետ բերելը բավական ծախսատար կլինի: Ուստի, նպատակահարմար է, որ դրանց վերանորոգումը իրականացվի Հայաստանում:
Այսօր Եվրասիական փորձագիտական ակումբի կազմակերպած «Հայ-ռուսական հարաբերությունները 2019 թվականին. Հնարավորությունների նոր պատուհան» թեմայով քննարկման ժամանակ, «Ռուսաստանը եւ Հայաստանը տարածաշրջանային անվտանգության համակարգում» վերտառությամբ ելույթում փորձագետը, մասնավորապես ասաց, որ հայ-ռուսական ռազմարդյունաբերական զարգացումը հնարավոր է իրականացնել Չարենցավանում գտնվող գործարանում:
Այլ մանրամասները`տեսանյութում
Կարդացեք նաև
«Հաշվի առնելով Մերձավոր Արևելքում պահպանվող անկայունությունը, որտեղ Ռուսաստանն այսօր հանդիսանում է գլխավոր դերակատարներից, իսկ Հայաստանը, փաստացի, այդ տարածաշրջանի մաս է հանդիսանում, ռազմական ոլորտում Մոսկվայի և Երևանի փոխգործակցության խորացումը դառնում է էլ ավելի կարևոր»,- ասաց փորձագետը`հավելելով, որ ինչպես բազմաթիվ երկկողմ համագործակցության ձևաչափերը, այնպես էլ երկու երկրների ներկայությունը ՀԱՊԿ-ում և ԵԱՏՄ-ում ճիշտ մոտեցման դեպքում կարող են հնարավորություն ընձեռել համատեղ գործունեության արդյունավետությունը բավականին բարձրացնելու համար: «Ավելին, հայ-ռուսական հարաբերությունների արդիականացումը հնարավորություն կտա նոր բազմակողմ հարաբերություններ ձևավորել` թիրախավորելով նոր ոլորտներում ու ձևաչափերում համագործակցության զարգացումը: Դա, իր հերթին, թույլ կտա անվտանգության ոլորտում տարածաշրջանային նոր խաղացողներ ներգրավել, այդպիսով ամրապնդելով արդեն իսկ գոյություն ունեցող ձևաչափերը»,- ասաց նա:
Նելլի ԳՐԻԳՈՐՅԱՆ
