Խաչատրյանի 7-րդ միջազգային փառատոնի շրջանակում Կամերային երաժշտության երեկո էր, որի ընթացքում հանդես եկան Խաչատրյանի միջազգային մրցույթի տարբեր տարիների հաղթողներ Ջոնաթան Սվենսենը (թավջութակ) եւ Հռիփսիմե Աղաքարյանը (դաշնամուր)։ Կամերային համերգի ընթացքում հնչեցին Արամ Խաչատրյանի, Ֆրանց Շուբերտի, Դմիտրի Շոստակովիչի եւ այլ կոմպոզիտորների ստեղծագործություններ։
Երաժշտագետ Օլյա Նուրիջանյանը նկատում է, որ շատ խորհրդանշական է այս երկու երիտասարդ երաժիշտների համատեղ ելույթը։ Երկուսն էլ հյուսիսից են՝ Հռիփսիմեն՝ Հայաստանի հյուսիսից, Ջոնաթանը՝ Եվրոպայի հյուսիսից։ Երաժշտագետը կարեւորեց միջազգային փառատոնի ստեղծագործական մոտեցումը. երբեք միմյանց չհանդիպած երաժիշտները, որ հաղթել են խաչատրյանական մրցույթում, համախմբվել են մեկ համերգային նախագծում եւ Խաչատրյանի տանը։ Համատեղ հնչում են Խաչատրյանի սիրելի ու նվագած գործիքները՝ դաշնամուրն ու թավջութակը։ Հետաքրքիր է ընտրված համերգային ծրագիրը՝ հանդիպում են Խաչատրյանն ու Շոստակովիչը՝ ժամանակակիցներ, ընկերներ։
Ուշագրավ է, որ Ջոնաթան Սվենսենի համար Խաչատրյանի միջազգային մրցույթն առաջինն էր, որ հաղթել էր, իսկ Հռիփսիմե Աղաքարյանի համար խաչատրյանական մրցույթը հերթականը, բայց, ինչպես ինքն է խոստովանում, ամենապատասխանատուն է եղել։
Ջոնաթան Սվենսենը նշում է, որ ուրախ է վերադառնալ Հայաստան ու ելույթ ունենալ հայ հանդիսատեսի առաջ։ Նա ընդգծեց, որ սիրով է գալիս Հայաստան, քանի որ մեր երկիրը մեծ դեր է ունեցել իր կենսագրության եւ մասնագիտական առաջընթացի համար։ Իսկ ներկայացված համերգային ծրագիրը Հռիփսիմե Աղաքարյանի հետ նա նվագում էր առաջին անգամ ու շատ տպավորված է ունկնդրի ընդունելությունից։
Կարդացեք նաև
Հիշեցնենք, որ Խաչատրյանի միջազգային փառատոնը կազմակերպել է Հայաստանի պետական սիմֆոնիկ նվագախումբը (գեղարվեստական ղեկավար եւ գլխավոր դիրիժոր՝ Սերգեյ Սմբատյան)՝ ՀՀ կրթության, գիտության, մշակույթի եւ սպորտի նախարարության աջակցությամբ։
ՀԱՅԱՍՏԱՆԻ ՊԵՏԱԿԱՆ ՍԻՄՖՈՆԻԿ ՆՎԱԳԱԽՄԲԻ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
