«Կառավարությունը չի փորձում վերլուծել, թե ինչն է պատճառը, որ ներդրումներ չունենք, փոխարենը փորձում է ամեն կերպ քողարկել, թե իրավիճակը շատ լավ է ու մտահոգվելու որևէ առիթ չկա»,- ներդրումների բացակայության մասին խոսելիս «Տեսակետ» մամուլի ակումբում ասաց Քրիստոնեա-դեմոկրատական կուսակցության նախագահ Խոսրով Հարությունյանը:
Հարությունյանը նշեց, որ թյուր է այն կարծիքը, թե բավական է հայտարարել, որ մենք արեցինք հեղափոխություն և կոռուպցիոն նախկին համակարգը վերացրեցինք, և աշխարհում պոտենցիալ բոլոր ներդրողները վազելու են Հայաստան։
«Ներդրումներ գրավելու համար պետք է համակարգ։ Մեկը տնտեսական դիվանագիտությունն է՝ մեր դեսպաններն այսօր ներդրողներով չեն զբաղվում, նրանք այդպիսի հանձնարարություն էլ չեն ստանում։ Տնտեսական դիվանագիտությունը՝ որպես համակարգ, չկա։ Եվ վերջապես, ես կարծում եմ ժամանակն է գիտակցենք, որ հեղափոխությունը պրոպագանդելով մենք ներդրողների չենք գայթակղում։ Կարծում եմ ճիշտ հակառակը, որևէ ներդրող հեղափոխական միջավայրում ներդրումներ չի կատարում։ Ներդրումները լուրջ պրոբլեմներ են դարձել Հայաստանի տնտեսության համար։ Եթե փորձենք տնտեսական հատվածն ամփոփել՝ համար մեկ խնդիրը ներդրումներն են։ Չկա համակարգ, որն ինքնաշխատ կարող է գործել ներդրումներ ներգրավելու ուղղությամբ»:
Սոնա Քաբաբյան
