Անդրադառնալով դեկտեմբերի 19-ի նիստից հետո Սամվել Բաբայանի հայտարարությանը, թե վարչական դատարանը հերթական անգամ հետաձգել է որոշման կայացումը՝ հրաժարվելով ընդունել Արցախի քաղաքացիությունից Ս. Բաբայանին զրկելու որոշման անօրինականությունը, ըստ այդմ՝ նաև նրա իրավունքների վերականգնումը, ԱՀ դատական դեպարտամենտը հայտարարություն է տարածել՝ տալով միակողմանի մեկնաբանություն:
Սամվել Բաբայանն ընդդեմ ԱՀ Ոստիկանության վիզաների վարչության վարչական գործով ս.թ. դեկտեմբերի 19-ի նախնական դատական նիստը հերթական անգամ հետաձգվել է, այո´, հայցվոր Սամվել Բաբայանի ներկայացուցիչների միջնորդության հիման վրա:
Դատարանի կողմից գործի փաստերը ի պաշտոնե պարզելը վարչական դատավարության օրենսգրքի պահանջն է: Ս. Բաբայանի գործով փաստական ապացույցները դատարանը պահանջել է վարչական մարմնից նախորդ նիստին (սեպտեմբեր ամսին), որից մի քանի օր անց ստացել է պատասխանը, սակայն հարցմամբ պահանջվող տեղեկատվությունը ակնհայտ թերի է և ոչ վերաբերելի: Փաստական այսպիսի տվյալների հիման վրա որոշում կայացնելը ակնհայտորեն հակասում է հայցվոր կողմի շահերին:
Ուստի, հիմք ընդունելով վարչական մարմնի, տվյալ դեպքում՝ ԱՀ զինվորական կոմիսարիատի՝ միջնորդությանը տված ոչ ամբողջական պատասխանը՝ հայցվոր կողմը ստիպված է եղել ներկայացնելու հերթական միջնորդությունը՝ պահանջելով, որ դատարանը ԱՀ պաշտպանության նախարարությունից պահանջի 2006 թվականի սեպտեմբերի 8-ին նախորդող և անմիջապես հաջորդող ժամանակահատվածներում Սամվել Բաբայանին զինվորական հաշվառումից հանելու համար հիմք ծառայած փաստաթղթերը։
Կարդացեք նաև
Սույն միջնորդությունը բխում է անձի ազատ, արդար, ողջամիտ ժամկետներում գործի քննության իրավունքի իրացման անհրաժեշտությունից՝ նկատի ունենալով այն, որ ակնկալվող դատական ակտով իրավունքի վերականգնումը հայցվորին անհրաժեշտ է իր ընտրական իրավունքի իրականացման համար։
Հայտնի է, որ 2020 թվականի մարտ-ապրիլ ամիսներին անցկացվելու են ԱՀ Նախագահի և Ազգային Ժողովի համաժամանակյա ընտրություններ։ Համապետական ընտրություններում որպես թեկնածու առաջադրվելու համար անհրաժեշտ է դատական կարգով վերականգնել հայցվոր Ս. Բաբայանի խախտված իրավունքները, քանի որ կայացվելիք դատական ակտը փաստական իրավաբանական հետևանք կարող է ունենալ մինչև Կենտրոնական ընտրական հանձնաժողովի կողմից թեկնածուների առաջադրումը նախատեսող ժամկետի ավարտը:
Ըստ էության չհերքելով գործի շրջանակներում տեղի ունեցած 8 նախնական դատական նիստից 7-ը կողմերի միջնորդություններով, ընդ որում 6-ը՝ Սամվել Բաբայանի ներկայացուցիչների նախաձեռնությամբ հետաձգելը, այնուամենայնիվ, արձանագրում ենք, որ անձի՝ ողջամիտ ժամկետներում գործի քննության իրավունքի իրացումը կապված է վարչական մարմնի անգործության հետ:
ՍԱՄՎԵԼ ԲԱԲԱՅԱՆԻ ԳՐԱՍԵՆՅԱԿԻ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
