2016թ.-ի ապրիլյան ռազմական գործողությունների հանգամանքներն ուսումնասիրող ԱԺ քննիչ հանձնաժողովի փակ նիստում այսօր մի քանի ժամ հանձնաժողովականները հարցեր են հղել ՀՀ ԶՈւ հրթիռային զորքերի եւ հրետանու վարչության նախկին պետ, գեներալ-մայոր Ալբերտ Մարդոյանին, որը 2016թ.-ին զբաղեցնում էր այդ պաշտոնը, եւ զորացրվել էր արդեն 2017-ին:
«Աշխատեցինք բավականին երկար, քանի որ պարոն Մարդոյանի հետ աշխատանքը կարեւոր է: Շնորհակալ ենք նրան՝ մեզ այդքան ժամանակ տրամադրելու, մեզ կարեւոր տեղեկատվություն փոխանցելու, բանակի ապագային միտված պատկերացումները ներկայացնելու համար»,-Մարդոյանի հետ հանդիպումը լրագրողների հետ զրույցում այսպես մեկնաբանեց հանձնաժողովի նախագահ, «Իմ քայլի» պատգամավոր Անդրանիկ Քոչարյանը:
https://www.facebook.com/aravot.am/videos/2773819439342851/
Կարդացեք նաև
Լրագրողները հետաքրքրվեցին, թե ապրիլյան դեպքերի հետ կապված ինչ թերացումներ կարելի է արձանագրել այս հանդիպման արդյունքում: «Երբ նայում եք գեներալին եւ լսում իմ մեկնաբանությունները, նման գնահատական հնչեցնելու…դա կհարցնեք, երբ կկարդաք հանձնաժողովի եզրակացությունը: Հարցերի պատասխանները ստանալու եք ամիսներ հետո»,-պատասխանեց Անդրանիկ Քոչարյանը:
Թե ինչ կարծիքի է հանձնաժողովի մասին Ալբերտ Մարդոյանը, նա նշեց. «Սպասելիք ունեմ, որ վերլուծությունը կկատարվի, եւ հաջորդ քայլերը կլինեն ի նպաստ բանակի»:
Հարցին՝ «Դուք էլ եք կասկածներ ունեցե՞լ ապրիլյան պատերազմի հետ կապված», Մարդոյանը բացասական պատասխան տվեց:
Լրագրողները նաեւ հարցրին, թե Մարդոյանն ինչ կարծիքի է Փաշինյանի այն հայտարարության մասին, որ ապրիլյան պատերազմի առնչությամբ դավադրություն կա: Մարդոյանի փոխարեն Անդրանիկ Քոչարյանը պատասխանեց. «Դուք հիմա քաղաքական հարցեր եք տալիս գեներալին: Այդ հարցերը պետք է տալ մեր եզրակացություններն ընթերցելուց հետո»:
Այնուհետեւ հարցին՝ «պատասխան գործողությունների առումով հրահանգի ուշացում եղե՞լ է», Ալբերտ Մարդոյանը բացասական պատասխան տվեց:
Լուիզա ՍՈՒՔԻԱՍՅԱՆ
