Ենթադրվում է, որ այսօր ԱԺ-ի այս տարվա վերջին նիստն է, թեեւ, ինչպես ԱԺ նախագահ Արարատ Միրզոյանն ասաց՝ համայնքը զորավոր է, համայնքը ուժ ունի ու եթե պատգամավորական համայնքը որոշեց եւս մեկ արտահերթ նիստ անել, ոչինչ անել չեն կարող, պետք է նորից հավաքվեն:
Այնուամենայնիվ, այսօր իրենց ելույթների վերջում պատգամավորներն արդեն ամանորյա շնորհավորանքներ էին հղում միմյանց:
ԲՀԿ պատգամավոր Նաիրա Զոհրաբյանի շնորհավորանք-բարեմաղթանքն ԱԺ դահլիճում բուռն ծափերի արժանացավ: Նա ասաց. «Ուզում եմ, որ տարին երջանիկ, բարի լինի բոլորիս համար, ուզում եմ, որ այն բացասական էներգիան, որ շատ դեպքերում մեզանից յուրաքանչյուրը բերում է այս դահլիճ եւ շատ դեպքերում քաղաքական բանավեճն իջնում է անձնական հարթակ, որը չի կարելի, հետո մենք գնում ենք ու մեզանից յուրաքանչյուրը մեզ չի ներում ոգեւորվելու, բռնկվելու համար: Պահենք արմագեդոնի հասնող բանավեճեր, բայց միայն քաղաքական բանավեճեր, երբեւէ դիսկուրսը չիջեցնենք անձնական հարթակ, որովհետեւ էդտեղ պարտվում ենք բոլորս»:
Արարատ Միրզոյանը կատակեց. «Շատ կարեւոր է դա լսել հատկապես ձեզնից, տիկին Զոհրաբյան»:
Կարդացեք նաև
ԱԺ տնտեսական հարցերի հանձնաժողովի նախագահ, իմքայլական Բաբկեն Թունյանն, արձագանքելով ԲՀԿ պատգամավոր Միքայել Մելքումյանի այն կանխատեսմանը, թե հունվարի 1-ից 5-7 տոկոս գնաճ է սպասվում՝ ասաց. «Չեմ ուզում տարին ավարտել վատատեսական սպասում ձեւավորելով: Ասում եք՝ ԵԱՏՄ մաքսատուրքերի հետ կապված գնաճ է սպասվում, ԿԲ-ի գնահատմամբ՝ գնաճի վրա ընդհանուր ազդեցությունը գնահատվում է 0.4-0,5 տոկոս, երկրորդը՝ կան այդտեղ ապրանքատեսակներ, որոնց գծով այս տարվա ընթացքում, օրինակ, թռչնի միսը, նկատվել է գների ոչ թե բարձրացում, այլ՝ գնանկում՝ հիմնականում պայմանավորված մենաշնորհային ուղղությունների թուլացմամբ: Հաջորդ տարի, իմ ակնկալմամբ, կլինեն այդ ապրանքներից շատերի գծով ոչ թե գների բարձրացում, այլ՝ հակառակը՝ գների նվազում: Այնպես որ մեր հայրենակիցներին խնդրում եմ դրան էդպես տագնապալի չմոտենալ, ամեն ինչ նորմալ է: Տնտեսական մրցակցության պաշտպանության հանձնաժողովը հսկողության տակ պետք է պահի, որ հանկարծ չարաշահումներ չլինեն, որ մեր քաղաքացիները կարողանան ինչպես ուզում են՝ իրենց ամանորյա սեղանը զարդարել»:
Ի դեպ, «Տեղական հանրաքվեի մասին» այն նախագիծը, որը քննարկելու համար այսօր ԱԺ արտահերթ նիստ էր հրավիրվել, ընդունվեց 96 կողմ 18 դեմ ձայներով:
Արարատ Միրզոյանը 7-րդ գումարման ԱԺ-ի 3-րդ նստաշրջանի աշխատանքները հայտարարեց փակված՝ շնորհավորելով Ամանորն ու Սուրբ ծնունդը:
Հռիփսիմե ՋԵԲԵՋՅԱՆ
