Այսօր` դեկտեմբերի 19-ին, կառավարության շենքի դիմաց տեղի ունեցավ ՀՅԴ երիտասարդական միության այս տարվա վերջին բողոքի ցույցն ընդդեմ Արայիկ Հարությունյանի պաշտոնավարման:
Արձագանքելով «Նիկոլ Աղբալյան» ուսանողական միության անդամների անունից հրապարակված նամակում պարունակվող Հրանտ Մարգարյանին վերագրվող պնդմանը, իշխանությանը պարտիզանական հարվածներ հասցնելու մասին, ցուցարարները իրենց «զենքերն» էին բերել, որ հանձնեն:
ՀՅԴ ՀԵՄ-Ի նախաձեռնության անդամ Արգիշտի Գևորգյանը անդրադառնալով պարտիզանական գործողությունների մասին լուրերին նշեց.
«Կոչ ենք անում Ազգային ժողովի մի խումբ անդամներին, ովքեր խուսափել են ծառայությունից, հանգիստ նստեն տեղները: Չփորձեք ցույց տալ, որ պետությունը պաշտպանում եք մեզնից: Այս երկրում պետականամետը և երկրի արթուն պաշտպանները մենք ենք ու լավ գիտեք, որ եթե դառնանք պարտիզաններ, ապա միայն սահմանից այն կողմ»:
Երիտասարդները ներկայացրին 15 փաստ, թե ինչու Արայիկ Հարությունյանը չի կարող այլևս զբաղեցնել այս պաշտոնը: ՀՅԴ ՀԵՄ-Ի նախաձեռնության անդամ Գոռ Սարգսյանը նշեց, որ փաստերը 15 հատից ավելի են, բայց իրենք առանձնացրել են կարևորագույնները.
Կարդացեք նաև
«Այս փաստերը խնդիր է նաև այն քաղհասարակության համար, ովքեր աչք են փակել այս ամենի վրա և կարծես չեն նկատել, որ Արայիկ Հարությունյանը այսպիսի քաղաքականություն է վարում»:
Բողոքի ցույցի մասնակիցները բերել էին նաև նամակ հանձնելու կառավարությանը և նշեցին, որ իրենց հետագա գործողությունները բխելու է այնտեղ նշված պահանջների կյանքի կոչման հրամայականից: Նամակը վերցնելու համար ցուցարարների մոտ եկավ ՀՀ կառավարության դիմում-բողոքների վերլուծության բաժնի ղեկավար Համլետ Նազարյանը:
Ցույցին նաև ներկա էին ՀՅԴ Նիկոլ Աղբալյան ուսանողական միության անդամները, և վարչության անդամ Հռիփսիմե Արշակյանը մեզ հետ զրույցում նշեց, որ այս շարժման առաջին իսկ օրից համաձայն են եղել և մասնակցել բողոքի ցույցերին:
Գառնի ՄՈՒԹԱՖՅԱՆ
