Դոնալդ Թրամփը դարձավ ԱՄՆ պատմության մեջ երրորդ նախագահը, որին Կոնգրեսի ներկայացուցիչների պալատը իմփիչմենթ հայտարարեց: Որոշումը՝ արդյոք Թրամփը կշարունակի կատարել իր պարտականությունները, կորոշի Սենատը՝ արդեն 2020թ., հաղորդում է BBC-ն:
Կոնգրեսում տեղի է ունեցել երկու քվեարկություն՝ մեղադրանքի ներկայացված երկու հոդվածներից յուրաքանչյուրով:
Իշխանության չարաշահման վերաբերյալ հոդվածը հավաքել է կոնգրեսականների 230 ձայն իմփիչմենթի օգտին, և 197 ձայն՝ դեմ:
Կոնգրեսի աշխատանքներին խոչընդոտելու հոդվածը ստացել է 229 կողմ ձայն իմփիչմենթի օգտին, 198 ձայն՝ դեմ:
Կարդացեք նաև
Իմփիչմենթ հայտարարելու համար անհրաժեշտ էր երկու հոդվածներից ցանկացածով հավաքել 216 ձայն:
Ներկայացուցիչների պալատում քվեարկության ժամանակ դեմոկրատներն ակնարկեցին, որ չեն պատրաստվում հրաժարվել Թրամփին իշխանությունից հեռացնելու փորձերից:
Ի դեպ, այս քվեարկությունը չի նշանակում, որ ԱՄՆ նախագահը պետք է հեռանա պաշտոնից, իսկ պաշտոնապես հայտարարված իմփիչմենթը կխանգարի նրան առաջադրվել երկրորդ ժամկետով:
Իմփիչմենթի հոդվածները
Ավելի վաղ Կոնգրեսի իրավական կոմիտեն հաստատել էր իմփիչմենթի հոդվածները՝ իշխանության չարաշահում և կոնգրեսի աշխատանքների խոչընդոտում: Չարաշահում ասելով նկատի ունեն այս տարվա հուլիսի 25-ին Դոնալդ Թրամփի զրույցը Ուկրաինայի նախագահ Վլադիմիր Զելենսկիի հետ:
Այդ զրույցի ընթացքում Սպիտակ տան ղեկավարը խնդրել էր քննություն սկսել նախկին փոխնախագահ Ջո Բայդենի դեմ: Վերջինիս որդին՝ Հանթեր Բայդենը 2014-2019թթ. եղել է ուկրաինական պետական նավթագազային Burisma ընկերության տնօրենների խորհրդի անդամ, և, ինչպես պնդում է Թրամփը, ներգրավված է եղել այդ երկրում կոռուպցիոն սխեմայում:
Ջո Բայդենն այդ ժամանակ իրականացնում էր ԱՄՆ աշխատակազմի՝ Ուկրաինայի հարցերով լիազորված ներկայացուցչի պարտականությունները, և ինչպես կարծում են Կոնգրեսի հանրապետականները, մասնակցություն է ունեցել Ուկրաինայի իրավապահ մարմինների ղեկավարներին աշխատանքից հեռացնելու գործին, քանի որ նրանք պատրաստվում էին կոռուպցիայի գործով քննություն սկսել այդ թվում իր որդու դեմ:
Այդ մեղադրանքը դեմոկրատները գնահատում են որպես կոչ մեկ այլ պետության՝ միջամտել ԱՄՆ ընտրություններին գործընթացին:
Բացի այդ, Կոնգրեսի դեմոկրատները ԱՄՆ նախագահին մեղադրանք էին ներկայացրել Ներկայացուցիչների պալատի աշխատանքների խոչընդոտման վերաբերյալ. Սպիտակ տան ղեկավարն արգելել էր աշխատակազմի բարձրաստիճան աշխատակիցներին պատասխանել օրենսդիրների կոչերին և հանդես գալ կոմիտեների լսումներին իմփիչմենթի գործընթացի շրջանակում:
«Մեղադրանքի կետերը հաստատում են, որ նախագահ Թրամփը իր անձնական և քաղաքական շահերը վեր է դասել ազգային անվտանգության, մեր ազատ և արդար ընտրությունների շահերից… Նա մասնակցել է իրավախախտումներում, որոնք կշարունակվեն, եթե մենք դրանք չդադարեցնենք: Հենց այդ պատճառով նախագահը Թրամփը պետք է ենթարկվի իմփիչմենթի և հեռացվի իշխանությունից»,- ասվում էր Կոնգրեսի իրավական կոմիտեի զեկույցում:
Ինչ կորոշի Սենատը
Ներկայացուցիչների պալատում քվեարկությունից հետո որոշումը կփոխանցվի Սենատին, որը պետք է վերջնականապես որոշի ԱՄՆ նախագահի ճակատագիրը: Ըստ սահմանադրության՝ իմփիչմենթի մասին կոնգրեսի որոշումը ունի «արտոնված» կարգավիճակ, այնպես որ Վերին պալատը պարտավոր է հետաձգել բոլոր մյուս քննարկումները և առաջնահերթ քննարկել այդ նախաձեռնությունը:
Շաբաթվա սկզբին Կոնգրեսում դեմոկրատների առաջնորդ Չակ Շումերը Սենատում հանրապետականների առաջնորդ Միտչ Մաքքոնելին առաջարկեց փոխզիջման գալ և պայմանավորվել իմփիչմենթի քննարկման ընթացակարգի շուրջ:
Ըստ սահմանադրության՝ Սենատը պետք է քննարկի Կոնգրեսի կողմից հաստատված մեղադրանքները, իսկ բոլոր սենատորներն այդ գործընթացում կկատարեն երդվյալ ատենակալների դեր: Իր հերթին Ներկայացուցիչների պալատի խոսնակ Նենսի Փելոսին պարտավոր է նշանակել օրենսդիրներ, որոնք հանդես կգան դատախազների և վկաների դերում, իսկ Սպիտակ տունը հնարավորություն կստանա ունենալ իր փաստաբանները:
Ինչ կլինի հետո
Կոնգրեսում հանրապետականները պատրաստվում են սկսել Ներկայացուցիչների պալատի առաջ քաշած մեղադրանքների քննարկումները արդեն 2020թ. հունվարին: Ընդ որում, գրեթե ոչ մեկ չի կասկածում, որ Կոնգրեսի վերին պալատը լիարժեք կերպով կարդարացնի նախագահին: Նրա ընդդիմադիրներին Սենատում անհրաժեշտ է հավաքել ձայների երկու երրորդը, մինչդեռ այժմ այնտեղ դեմոկրատներն ունեն միայն 47 ներկայացուցիչ՝ 53-ի դեմ:
Եվս մեկ խնդիր է ԱՄՆ քաղաքականության ապագան: Եթե Սենատն արդարացնի Թրամփին, դեմոկրատները ստիպված կլինեն գործակցել Սպիտակ տան հետ մի շարք օրենսդրական նախաձեռնությունների շուրջ: Բացի այդ, իմփիչմենթ հայտարարելի չի խանգարի գործող նախագահին ևս մեկ անգամ առաջադրել թեկնածությունը 2020թ. նախագահական ընտրություններում:
Ինչպես են նրանք պատրաստվում գործակցել նախագահի հետ դրանից հետո, առայժմ հայտնի չէ:
«Եթե նախագահը պատասխանատվության չենթարկվի, եթե Սենատում իմ գործընկերները չկատարեն իրենց պարտավորությունները, ապա մեր ժողովրդավարությունը սպառնալիքի տակ կլինի»,- BBC-ին ասել է կոնգրեսական Դեյվիդ Սիսիլինը:
Պատրաստեց՝ Վիկտորյա ԱՆԴՐԵԱՍՅԱՆԸ
