Ինչպես արդեն տեղեկացրել ենք, Վերաքննիչ քրեական դատարանը (նախագահող դատավոր Լուսինե Աբգարյան) հրապարակեց ՀՀ երկրորդ նախագահ Ռոբերտ Քոչարյանի պաշտպանների կողմից դատավորին ներկայացրած ինքնաբացարկի միջնորդության վերաբերյալ որոշումը: Նիստին ներկա էր նաև Ռոբերտ Քոչարյանը: Նախագահող դատավորը ինքնաբացարկ չհայտնեց: Այնուհետև անցում կատարվեց դատաքննության փուլին:
Ռոբերտ Քոչարյանի ելույթից հետո տեղի ունեցավ Վերաքննիչ բողոքի քննարկման ամփոփում: Կողմերի ներկայացուցիչները հանդես եկան ամփոփիչ ելույթներով:
Մեղադրող դատախազ Գևորգ Բաղդասարյանը, անդրադառնալով Հայկ Ալումյանի հայտարարություններին, նշեց, թե մոտ կես ժամ խոսվեց այն մասին, որ հանրահավաք այստեղ չպետք է լիներ և ասաց, որ այդ հանրահավաքը եղավ և ընդհանրապես դատարանին խնդրեց, որ դատական նիստի կարգը պահվի: Նա ասաց, թե դատական նիստերի դահլիճից ինչ-որ մեկը որոշում է, որ պետք է այդ անձինք հեռացվեն, ինչը անթույլատրելի է: Գևորգ Բաղդասարյանը փաստեց՝ սա դատարան է, չի կարող դատավորը կոչ անել, որ լռեն, մեկը մյուսին հանձնարարություն տա:
Տուժողի ներկայացուցիչ Սեդա Սաֆարյանը, դառնալով գրավի մասին քննարկումներին, հստակեցրեց. «Առաջին ատյանի դատաքննության ժամանակ երբևէ գրավը անթույլատրելի չի ճանաչվել այն պատճառով, որ գրավի գումարի բռնագանձմանն ուղղված իրավակարգավորում չկա: Հետևապես ես կարծում եմ՝ ուղղակի ի զորու չէ գրավն այդ ռիսկերը քննարկել»:
Կարդացեք նաև
Հայկ Ալումյանն էլ, անդրադառնալով Ռոբերտ Քոչարյանի հայտարարությանը և դատավորի կողմից նրա ելույթի սահմանափակմանը, ասաց. «Ռոբերտ Քոչարյանն իրավունք ուներ իր անձը ներկայացնել: Նա ուղղակի դատարան էր եկել և իրավունք ուներ իր անձին վերաբերող տեղեկություններ ներկայացնել, և դատարանն իրավունք չուներ սահմանափակել»:
Նախագահող դատավորը վերաքննիչ բողոքի քննությունը համարեց ավարտված և անցավ խորհրդակցական սենյակ: Դատական ակտը կհրապարակվի դեկտեմբերի 20-ին՝ ժամը 16.00-ին:
Տաթև ՀԱՐՈՒԹՅՈՒՆՅԱՆ
