«Օրենքը բավական երկար եւ մանրամասն քննարկվել է, մենք բոլոր ռեկտորներով նախարարի մոտ քննարկել ենք ու հայտնել մեր մտահոգությունները: Վերջին նախագիծն այս տեսքով ինձ համար խնդրահարույց չէ եւ անհանգստացնող որեւէ կետ չեմ նկատում, իսկ օրենքի շուրջ աղմուկը մի քիչ արհեստածին եմ համարում»,- «Արմենպրեսի» մամուլի սրահում կայացած ասուլիսում ասաց Երևանի թատրոնի և կինոյի պետական ինստիտուտի ռեկտոր Լիլիթ Արզումանյանը` ՀՀ Բարձրագույն կրթության և գիտության մասին ՀՀ օրենքի նախագծի մասին խոսելիս: Նրա ձեւակերպմամբ, ցանկացած օրենք ունի դաշտը կարգավորելու խնդիր:
Լիլիթ Արզումանյանն ասում է, որ բուհերի ինքնուրույնությունը մեծանում է նոր օրենքով, խոսքը վերաբերում է մասնավորապես հայոց լեզու, հայ գրականություն եւ հայոց պատմություն առարկաներին: Ռեկտորը կարծում է, որ դրանում վատ բան չկա, որ ընտրությունը թողնված է բուհի հայեցողությանը:
Հայաստանի պետական տնտեսագիտական համալսարանի ռեկտորի պաշտոնակատար Դիանա Գալոյանը համոզված է, որ օրենքի նոր նախագիծը որակին միտված էական փոփոխություն ունի նախորդ օրենքի համեմատությամբ: Նա եւս կարծիք հայտնեց, որ նոր օրենքով ընդլայնվում է բուհերի ինքնավարությունը. «Բուհերը կարող են ավելի ճկուն լինել եւ հարմարեցնել իրենց կրթական ծրագրերը աշխատաշուկայի պահանջներին»:
Դիանա Գալոյանի խոսքերով, բուհերն այժմ իրենք են սահմանելու ուսանողների հեռացման եւ վերականգնման կարգերը, ինչը նույնպես ազատության դրսեւորում է, նաեւ բուհերը ազատ են լինելու սեփական ֆինանսները կառավարելու առումով:
Կարդացեք նաև
Երևանի Վ.Բրյուսովի անվան պետական լեզվահասարակագիտական համալսարանի ռեկտոր Կարինե Հարությունյանի դիտարկմամբ, օրենքի նոր նախագիծը լուրջ առաջընթաց է գործող օրենքի նկատմամբ. «Ըստ էության լուծում է տրված մի շարք հարցերի, որոնք տարիներ շարունակ քննարկվել են եւ խնդիր են եղել բարձրագույն կրթության համակարգում»: Նրա խոսքերով, բարձրագույն կրթության որակին ուղղված մի շարք դրույթներ են ներառվել, օրինակ, գոյություն ունեցող հեռակա ուսուցման ձեւը, որը մշտապես դժգոհության տեղիք է տվել որակի առումով, օրենքի նախագծով լուծում է ստացել. «Հեռակա ուսուցումը փոխարինված է մասնակի բեռնվածությամբ ուսուցման կարգով, ինչը համահունչ է միջազգային պրակտիկային»:
Տիկին Հարությունյանը փաստեց, որ նոր օրենքով, ուսանողները կարող են իրենք ընտրել իրենց բեռնվածությունը` կիսամյակի կամ ուսումնական տարվա ընթացքում, ուսանողի ուսումնառության տարիները տվյալ դեպքում կարող են ավելանալ, բայց նա կարող է կառավարել իր ժամանակը եւ կյանքը: Նրա խոսքով, այսուհետ անվճարի համար անհրաժեշտ միավորներ ստացած ուսանողն է ընտրելու այն բուհը, որտեղ կսովորի, եւ գումարը կտրվի նրա ընտրած այդ բուհին, ինչը կխթանի բուհերի միջեւ մրցակցությունը:
Գոհար ՀԱԿՈԲՅԱՆ
