2016թ.-ին ՀՀ ոստիկանության ՊՊԾ գունդը զավթած եւ մի շարք ծանր հանցագործությունների կատարման համար մեղադրվող «Սասնա ծռեր» խմբի գործով հերթական դատական նիստում այսօր զոհված ոստիկաններից Յուրի Տեփանոսյանի ծնողներից ստացվել էր նամակ-դիմում, որը հրապարակեց այս գործով դատավոր Մեսրոպ Մակյանը:
Վահրամ եւ Աշխեն Տեփանոսյանների նամակում ասված է. «Ձեր վարույթում քննվող գործում քննարկվում է մեր որդու սպանության հարցը: Մենք քանիցս ասել ենք եւ հիմա էլ պնդում ենք, որ մեր որդու սպանության գործն այս դատավարության միջոցով լուծում չի ստանալու: Նրա սպանության իրական փաստերն այստեղ չեն քննարկվելու: Երբ ես՝ Վահրամ Տեփանոսյանս (լուսանկարում), դատարանում ցուցմունք տվեցի, դատախազներն ասացին, թե իմ ասածը բամբասանքի մակարդակի է: Այո, իմ ասածը հակասում է գործի նյութերին, այլապես մենք ի՞նչ գործ կունենայինք դատարանում: Եթե մենք ասելու էինք այն, ինչ կա գործի նյութերում, էլ ո՞րն է մեր բողոքի առիթը: Իրականում ոչ թե մեր պնդումներն են բամբասանք կամ սխալ, այլ այն ամենը, ինչը քննվում է դատարանում: Եթե նույնը չենք ասում, ուրեմն ստո՞ւմ ենք: Այս գործի նյութերում կան շատ կեղծիքներ եւ սխալներ: Մեր որդու վերաբերյալ ցուցմունքներն ու փորձաքննության արդյունքները չեն համապատասխանում իրականությանը եւ դրանք են բամբասանք»:
Նամակում Տեփանոսյանները մատնանշել են այն փաստերը, որոնք, իրենց բնորոշմամբ, կեղծիք են եւ դատարանում չեն հրապարակվել այնպես, ինչպես իրականում է եղել: Դրանց թվում նշված են հետեւյալ հանգամանքները(մեջբերումները՝ մասնակի).
-Եթե մեքենայի (այն ծառայողական մեքենայի, որում նստած է եղել Յուրի Տեփանոսյանը.-խմբ.) ուղղությամբ կրակոցները եղել են նույն զենքից եւ տեղից, ինչպե՞ս է ստացվել, որ դրանց հետագծերը տարբեր են:
Կարդացեք նաև
-Մենք չենք հավատում, որ փորձաքննությունները ճիշտ են կատարվել: Դատաձգաբանական եզրակացություններ եւս արժանահավատ չեն:
-Մեր որդու բերանում եւ մեքենայում հայտնաբերված գնդակների հետքերի ոչնչացված լինելու պատճառով հնարավոր չէ պարզել՝ դրանք որեւէ պարկուճի հետ ամբողջություն կազմե՞լ են, համընկե՞լ են, թե ոչ:
-Փաստ է, որ մեր որդու մարմնի եւ մեքենայում եղած գնդակների պարկուճները կամ չկան, կամ չի կատարվել պատշաճ փորձաքննություն: Մեր որդու սպանության հանգամանքներն այն չեն, ինչ քննվում են դատարանում:
-Վկաների ցուցմունքների տարբերությունը միայն նրանց անուն-ազգանուններն են: Ինչո՞ւ են այդ ոստիկանները հարցաքննվել դեպքից 25 օր անց: Մենք կասկածում ենք, որ ուշացումը պայմանավորված է մեր որդու սպանության իրական հանգամանքները թաքցնելով:
-Մենք ներկայացրել ենք կեղծիքների մի մասը միայն: Չենք անդրադառնում այն կեղծիքներին, որոնք գործում չկան, բայց հանդիսացել են մեր որդու սպանության պատճառ:
-Խնդրում ենք պատշաճ ուշադրություն դարձնել մեր ներկայացրած փաստերին, քանի որ չենք հավատում, որ մեր որդու սպանության հանգամանքները ներկայացվել են դատարանում: Խնդրում ենք կրկին քննարկել մեզ՝ մեր որդու իրավահաջորդներ ներգրավելու հարցը:
Հիշեցնենք, որ երկու ոստիկանի՝ Յուրի Տեփանոսյանի եւ Արթուր Վանոյանի սպանության համար մեղադրվում է «Սասնա ծռերի» անդամ Սմբատ Բարսեղյանը, որն իրեն մեղավոր չի ճանաչում: Տեփանոսյանի հայրը պնդում է, որ որդուն ՊՊԾ գունդը զավթածները չեն սպանել:
Հիշեցնենք նաեւ, որ այս գործով Յուրի Տեփանոսյանի՝ որպես տուժող իրավահաջորդն արդեն իսկ նրա այրին է՝ Արփինե Թումասյանը: Դատավոր Մակյանը նրանից հետաքրքրվեց՝ պատրա՞ստ է իր լիազորությունը զիջել զոհված ամուսնու ծնողներին: «Իհարկե՝ ոչ, ես եմ տուժողի իրավահաջորդը»,-պատասխանեց Արփինե Թումասյանը:
Ի վերջո, դատավոր Մակյանն արձանագրեց, որ քրեական դատավարության օրենսգիրքը սահմանում է՝ տուժողի իրավահաջորդ կարող է լինել մեկ անձ, իսկ այս դեպքում այդ անձն Արփինե Թումասյանն է, որն ի սկզբանե մասնակցում է նիստերին:
«Նամակում ներկայացված փաստերը, որոնք, ըստ Վահրամ Տեփանոսյանի, այլ հանգամանքների մասին են խոսում, կտրամադրվեն տիկին Թումասյանին: Չի բացառվում, որ տիկին Թումասյանը կպաշտպանի այդ տեսակետները»,-հայտարարեց Մեսրոպ Մակյանը,-ապա հավելեց,-«այսպիսով, Վահրամ Տեփանոսյանի ներկայությունը պատշաճ ապահովված է, ուստի Վահրամ եւ Աշխեն Տեփանոսյանների միջնորդությունը մերժվում է»:
Հիշեցնենք՝ Արփինե Թումասյանի եւ Տեփանոսյանի ծնողների հարաբերություններում հակասություն կա. Թումասյանը համաձայն չէ նրանց այն պնդման հետ, որ ամուսնուն իրականում ոստիկաններն են սպանել:
Լուիզա ՍՈՒՔԻԱՍՅԱՆ
