«Մեկ Հայաստան» կուսակցության նախագահ Արթուր Ղազինյանն անցնող տարում արձանագրել է, որ Հայաստանում իրավական պետության դեմ պայքար է ընթանում: Այսօր հրավիրված մամուլի ասուլիսում Արթուր Ղազինյանը հիշեց դատարանների մուտքերն ու ելքերը շրջափակելու վարչապետի կոչը՝ նկատելով, որ դա ոչ միայն ՀՀ Սահմանադրության եւ տարբեր օրենքների կոպտագույն խախտում էր, այլ նաեւ իր մեջ քաղաքական գնահատական էր պարունակում:
«Այնուհետև սկսվեցին հարձակումները դատական իշխանության վրա։ Գործող իշխանությունները դատական համակարգն ընդունեցին որպես քաղաքական ինստիտուտ և որոշեցին ստուգել դատական համակարգի քաղաքական վստահելիության աստիճանը։ Դա խորը մոլորություն է, որովհետև դատական համակարգը մասնագիտական կառույց է, որի վստահելիությունը չափվում է բացառապես նրանց վարույթում գտնվող վարույթների քանակով և դատավարական գործընթացների մասնակցող սուբյեկտների թվով»,- ասաց Արթուր Ղազինյանը:
Իսկ Սահմանադրական դատարանին ուղղված իշխանությունների քայլերը, մասնագիտությամբ իրավաբան Արթուր Ղազինյանը որակում է հարձակումներ եւ վստահեցնում, որ Հայաստանում օր առաջ պետք է մշակել իրավական անվտանգության հայեցակարգ։ Կուսակցությունում այս ուղղությամբ արդեն իսկ աշխատանքներ տարվում են:
Այլ մանրամասները՝ տեսանյութում
Կարդացեք նաև
Անդրադառնալով պետական կառավարման համակարգի ներկայիս իրավիճակին էլ, բանախոսն ասաց, որ 1,5 տարի անց ՀՀ իշխանությունները չեն կարողանում հասկանալ կառավարման մեխանիզմները եւ արձանագրեց. «ՀՀ-ն չի կառավարվում»:
Մանրամասները՝ տեսանյութում
Անդրադառնալով վարչապետի հայտարարած տնտեսական հեղափոխությանն ու դրա արդյունքներին, Արթուր Ղազինյանն ասաց. «Առհասարակ, տնտեսական հեղափոխություն տերմինն արդեն իսկ կազուսային է. տնտեսությունն ու հեղափոխությունը անհամատեղելի երևույթներ են։ Տնտեսությունը ենթադրում է կայունություն, կանխատեսելիություն, խաղի կանոնների որոշակիություն, նորմատիվ իրավական դաշտի կայունություն, քաղաքական դաշտի կայունություն։ Հեղափոխությունը մերժում է ամեն ինչ, հեղափոխությունը անկանխատեսելիություն է, քաոս է, անորոշություն է, գործող կառուցակարգերի վերացում է։ Տնտեսական հեղափոխության ամբողջ թեզը հիմնվում է ՀԴՄ կտրոնների վրա, որևէ այլ ռազմավարական ուղղություն կառավարության կողմից ներկայացված չի եղել, թե ինչպե՞ս պետք է տնտեսությունը զարգանա։ Ի՞նչ հեղափոխության մասին ենք մենք խոսում առհասարակ։ Ամբողջ ընդդիմադիր գործունեության ժամանակ այսօրվա իշխանությունները և հատկապես նրա ղեկավար Նիկոլ Փաշինյանը հայտարարում էր, որ տնտեսության 30 տոկոսը ստվերում է։ Հիմա իրենց իշխանության գալուց հետո պետք է ենթադրվեր, որ այդ թիվը այլևս չպետք է լինի, ուրեմն մենք պետք է վստահ լինենք, որ բյուջեի մուտքերը պետք է աճեն 30 տոկոսով։ Չի աճել 30 տոկոսով, հիմա կա՛մ Նիկոլ Փաշինյանը իրականացրել է քաղաքական մանիպուլյացիա, կա՛մ ստվերը կա և շարունակում է գործել»:
Նելլի ԳՐԻԳՈՐՅԱՆ
Լուսանկարը՝ «Մեկ Հայաստան» կուսակցության ֆեյսբուքյան էջից
