«Արդեն 60 000 քաղաքացու անվանական ստորագրություն կա ՀՀ-ից եւ Արցախից, բայց իշխանությունը շարունակում է անհեռանկար գործելաոճը»,-լրագրողների հետ զրույցում այսօր հայտարարեց Մարտի մեկի գործով ՀՀ սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի ազատության հանձնախմբի համակարգող, ՀՅԴ-ական նախկին պատգամավոր Աղվան Վարդանյանը: Նա նշեց, որ նորաստեղծ հանձնախմբի եւ ստորագրողների պահանջն է՝ Ռոբերտ Քոչարյանի խափանման միջոց կալանքի փոփոխությունը:
«Ստորագրողներին կարող եք ինքներդ հարցնել՝ պատրա՞ստ են փողոց դուրս գալ, կամ նման խնդիր դրված է, թե ոչ: Բայց որ հազարավորները պատրաստ են, ենթադրում եմ, բայց նման հարց այսօր դրված չէ: Միջոցների եւ դոնորների խնդիր չկա, պարզապես սրահ ենք վարձակալել այս ասուլիսի համար»,-պատասխանելով հարցին, թե արդյոք ստորագրողները պատրա՞ստ են փողոց դուրս գալ հանուն Քոչարյանի ազատության եւ ի՞նչ միջոցներով է հանձնախումբը գործում, ասաց Աղվան Վարդանյանը:
Նրա խոսքով՝ Քոչարյանին առաջադրված մեղադրանքը որեւէ կապ չունի Մարտի մեկի տասը զոհերի մահվան հանգամանքների բացահայտման հետ. «Նրան անազատության մեջ պահելն անպատիվ գործ է եւ չի բխում մեր պետության շահերից, վնասում է պետության վարկանիշը եւ խարխլում դատական համակարգը: Քոչարյանին բանտախցում պահելը ոչինչ չի տալիս ոչ որեւէ քաղաքացու, ոչ էլ պետությանը: Ամենապարզ ելքը խափանման միջոցը փոխելն է: Սա առաջին տարբերակն է: Իշխանությունը դատավորներին պարտադրում է հակաօրինական գործողություններ: Երկրորդ ճանապարհը Քոչարյանի խափանման միջոցի փոփոխությունը հանրային պահանջ դարձնելն է: Արձագանքելով այդ քաղաքացիների պահանջին՝ ստեղծվել է նախաձեռնող խումբ, որի նպատակը Ռոբերտ Քոչարյանի ազատությունն է»:
Աղվան Վարդանյանի բնորոշմամբ՝ Ռոբերտ Քոչարյանն իր գործունեության ընթացքում աշխատել է հարյուրավոր պաշտոնյաների հետ, եւ նրանք գիտեն նրա կյանքն ու գործը. «Մեր խնդիրն է՝ նաեւ այդ մարդկանց մղել դիրքորոշման, հանդիպել ԲԴԽ անդամների հետ, Մարդու իրավունքների պաշտպանի հետ»: Աղվան Վարդանյանը շեշտեց նաեւ այս գործընթացում ՀՀ նախագահ Արմեն Սարգսյանի, իր բնորոշմամբ, լռությունը. «Թաքնվելով եւ զգուշանալով՝ որեւէ խնդիր չի լուծվում: Արցախի նախագահները Ռոբերտ Քոչարյանի ազատության համար միջնորդություն ներկայացրին, եւ նրանց հետ որեւէ բան չեղավ: Մեր նախագահն այս առումով որեւէ մտածելու բան չունի»:
Կարդացեք նաև
Լուիզա ՍՈՒՔԻԱՍՅԱՆ
